NAHUMAN ang kampanya sa Philippine women’s volleyball team sa Southeast Asian Games human sila nakatilaw og kastigo sa Vietnam sulod sa tulo ka sunodsunod nga sets, 25-16, 25-21, 25-23, niadtong Sabado sa OCBC Arena sa Singapore.

Ang volleyball superstar sa Pilipinas nga si Alyssa Valdez nimugna og 11 puntos samtang nidugang og 10 puntos si Jaja Santiago apan sila ra’ng duha ang nakahimo og double-digit nga puntos alang sa RP Team.

Ang usa sa mga sinaligan sa RP Team nga si Rachel Anne Daquis, kinsa nasulod sa top10 nga listahan sa FHM sexiest women, nakahimo og walo ka puntos.

Ang Vietnam, silver medalist niadtong 2013, nakapa­himulos sa 32 ka turnovers nga nahimo sa RP Team.

Igo lang nakahipos og 1-2 nga rekord ang RP Team sa pool stage hinungdan nga napakyas silang pag-abante sa semis.