AMBOT kung nganong dili mawagtang kining sistema sa padrino ug palakasay.

Bisan ang pagpili og tawo nga patrabahuon ilabi na sa puwesto sa gobyerno kay dili sa "what you know" pero ang "whom you know".

Kung naa kay kapamilya, kabarilan, kumpare ug ka-inom sa maong buhatan seguradong ikaw ang makuha bisan diskuwalipikado.

Mao bitaw nga paglingkod ni PNoy sa Malacanang naghimo gidayon siya'g Executive Order nga papahawaon sa puwesto ang walay Career Eligibility sa mga high-ranking officials ug kadtong nasulod tungod sa "mid-night appointments".

Apil si kanhi Chief Justice Renato Corona nga suod ni PGMA sa ratsada.

Bisan dinhi sa Davao naglipang ang maong sistema mao nga ang programang Lingap Para sa Mahirap nga unta kuwarta man sa gobyerno, nagkinahanglan pa'g indurso ug ipaagi sa mga haring gangis sa politika.

Nahimo na gani kining career o trabaho sa ubang mga functionaries sa barangay kay dili man mahatagan og tukma, patas ug paspas nga serbisyo kung walay bendisyon sa mga kapartido. Humot kaayo sa tawo ang mga tigpasayon sa transaksiyon sa Lingap nga daghan kanila napili pang opisyal sa barangay sama sa kapitan, kagawad, purok leaders ug uban pa.

Sikat kaayo ang akong higalang kapitan nga si Edwin Cabuguas diha sa Mandug tungod sa Lingap. Walay bawt ang bisan kinsa pay moharong kaniya sa eleksiyon kay didto man modangop kaniya ang mga kabus ug timawa sa maong barangay. Nangita man ang tawo og serbisyo gikan sa ilang mga opisyales ug dili mga balaod, dibate ug istorya.

Hasta ang serbisyo sa Philippine Charity Sweepstakes Office (PCSO) magamit sab sa politika. Busa si Ireneo Maliksi, bag-ong chairman sa PCSO, nagbutyag nga iyang ayuhon ang operasyon sa PCSO sa iyang mandato nga maghatag og financial assistance sa mga kabus nga Pilipino.

Unahon daw niya’g tubag ang problema sa kadugay sa pag-release sa tabang nga usahay moabot og upat ka bulan. Naay higayon nga namatay na lang ang pasyente una pa niguwa ang ayuda nga hastang gamaya. Imbis ayuda sa buhi, abuloy sa patay na man hinuon.

Tungod niini, modugang og tawo ang PCSO nga moatiman sa katawhan og pagamyon ang gidaghanon sa papeles og proseso sa pag-aprubar sa hangyong tabang. Giseguro usab ni Maliksi nga kanhi kongresista sa Cavite nga "color blind" ang PCSO nga buot ipasabot bisan kinsa man ang mangayo, kapartido man o kontra-partido, basta kabus mahatagan gayud og ayuda.

Busa iyang pahimangno sa iyang mga kawani, mga LGUs ug mga ahensiya sa gobyerno nga dili dapat ipamolitika ang PCSO kay kini ang tinuod nga serbisyo alang sa kabus kay sila ang mga "Boss" nga maoy rason kung nganong natukod ang PCSO ug ubang susamang ahensiya sa gobyerno.

Dugang pa nga kinahanglang ipahibalo gidayon sa iyang buhatan si bisan kinsa nga mogamit sa PCSO sa ilang personal interes ug pamolitika.

Naa silay hotline ug website nga puwedeng i-report ang inyong mulo.

Dili tinuod nga kinahanglan pa ang approval ni kapitan, konsehal o congressman aron mahatagan og tabang gikan sa PCSO.

Saludo ako chairman ug unta matuman kini dinhi sa rehiyon.