NAGKANAYON si Cleveland Cavaliers superstar LeBron James nga panahon na aron hatagan og mas taas nga playing time ang ilang reserbang mga magduduwa karon nga niabot na sa krusyal nga bahin ang 2015 National Basketball Association (NBA) Finals.

Sa kasamtangan, nagtabla ang best-of-seven series sa Cavaliers ug Golden State Warriors human sa upat ka mga duwa, 2-2.

Ang Game 5 ipahigayon ugma (RP time) sa balwarte sa Warriors sa Oracle Arena diin kaupat pa lang nakatilaw og pilde ang Warriors karon nga season lakip na niini ang Game 2 sa finals.

Si Cavaliers coach David Blatt minggamit lang og duha ka reserbang mga magduduwa aron makatabang sa iyang starters sa kinatibuk-ang playoffs. Ang uban niyang lima ka reserbang mga magduduwa talagsa ra kaayong makasulod.

Gumikan niini, nabun-og ug hago na kaayo ang iyang starters hilabi na si LeBron James ug lakip na ang kalit nga nabantog nga si Matthew Dellavedova. Sila si James ug Dellavedova nakasinati na og cramps samtang nagkadugay ang series.

“That’s the coach’s decision if he decides he wants to go deeper in the bench. We haven’t played many guys throughout this playoff run,” matod ni James.

“I think it would help some of the guys that are playing some high minutes for sure, just give guys a couple minutes here, a couple minutes there. But I think the coaching staff will try to do what’s best to help us be physically and mentally prepared for Sunday.”

Ang reserbang mga magduduwa nga puwedeng kasaligan sa Cavaliers mao sila si Shawn Marion, Mike Miller, ug Branden Haywood.

Si Marion, 37, nakatabang og dako sa Dallas Mavericks sa paglangkat sa NBA title niadtong 2011 pinaagi sa pagbuntog sa James-led Miami Heat samtang si Miller kauban ni James sa Heat nga nakalangkat og duha ka mga kampiyunato.

Alang sa Cavaliers, nga ningkombati sa finals nga wala ang duha nila ka mga sinaligan nga sila si Kevin Love ug Kyrie Irving, ang bisan unsa ka gamay nga tabang ila gyu’ng gikinahanglan.

“We don’t have many options as far as lineups we can go to, but we can make adjustments. That’s what you do throughout a series,” matod ni James.

“We’ll get to the film and make the necessary adjustments coming into game five. But as far as lineup changes, we don’t have many different lineup changes we can actually go to.”

Sa dako nilang kapildihan sa Game 4, 82-103, ang Cavaliers tataw nga naapektuhan na sa fatigue ug wala na sila nakasugakod sa mas batan-ong puwersa sa Warriors sa 4th quarter.

“You want to be out there, but you want to be effective while you’re out there too,” pasabot ni James.

Sa kinatibuk-ang series hilabi na sa Game 4, paspas nga duwa gyud ang gihimo sa Warriors sa tinguha nga mahutdan og lahutay ang nahabiling mga magduduwa sa Cavaliers.

Human sa Game 3, si Dellavedova nahidangat sa ospital gumikan kay nakasinati kini’g grabeng cramps ug iya na sab kining nasinati sa Game 4.

Kalit lang nabantog si Dellavedova gumikan sa kanunay niyang paggukod sa labing pambato sa Warriors nga si Stephen Curry. (AP)