GIDID-AN ang pamilya sa walo ka buwan nga bata nga si Harry Morgan Visaya dihang gisuwayan pagkuha sa mga dokumento diha sa St. Anthony Mother & Child Hospital kagahapong adlawa.
Matod sa iyaan sa bata nga si Michelle Ylaya nga dihang nibisita sila sa maong tambalanan kagahapon sa buntag kauban ang igsuon niya ug inahan sa bata nga si Marifhe Ylaya aron unta magpa-clear sa ilahang record, gidid-an sila sa medical chief niini.
Dugang ni Ylaya nga mismo si Dr. Robert Denopol, medical chief sa SAMCH ang nakig-estorya kanila ug giingnan sila nga court order lang ang makapa-release nila sa mga dokumento nga ilang gipangayo.
Gusto makuha sa pamilya gikan sa ospital ang medical ug clinical abstract, medical certification ug laboratory result ni Harry.
Giingon nga dili usab mosugot si Denopol tungod kay na-demoralized na ang ilang tambalanan tungod sa pagpapublikar kun pagpa-media sa pamilya kabahin sa nahitabo sa bata.
Giklaro sa pamilya nga Ylaya nga wa pa sila mahinayon og pasaka og pormal nga reklamo batok sa tambalanan ug sa medical personnel niini tungod kay mikonsulta pa sila sa ilang abogado sa miaging semana.
Gikatakda nga ugmang adlawa, Lunes na sila mobisita sa Department of Health (DOH) 7 aron mangayo og tabang ug mobisita usab sila sa National Bureau of Investigation (NBI) 7 ug nagkadaiyang ahensiya aron makuha nila ang hustisya nga ilang gipangita.
Nitambag ang abogado kanila nga mangayo kang Denopol og letter nga nagpamatuod nga di kini mohatag sa mga dokumento apan dili gihapon mobuhat si Denopol.
Giawhag ang pamilya ni Cebu City Vice Mayor Edgardo Labella nga makigkita niya ugmang adlawa alang sa posible nga matabang niini kanila.
Ugma sa alas 4:00 sa hapon giingon nga pabisitaon ang pamilya diha sa buhatan ni Labella.