USA ka dinakpan ang nakaeskapo sa dihang gipatambalan sa ospital sa lungsod sa Tuburan samtang, laing usa ang nakaikyas sa operasyon batok sa drugas niadtong Biyernes sa managlahing dapit sa lalawigan sa Sugbo.
Si Dindo Naingue, 36, may kapuyo ug molupyo sa Barangay 7, Tuburan, napusilan sa kapulisan human nisuway sa pagsukol sa awtoridad, pasado alas 4:00 sa kaadlawon niadtong Biyernes.
Matod ni PO3 Douglas Maravillas sa Tuburan Police Station, si Naingue sa iyang wa nga bukton resulta sa iyang pagsukol sa kapulisan dihang gipahigayon ang buy-bust operation sa ilang dapit.
Usa ka babaye ang nagpakaaron-ingnon nga poseur-buyer sa kapulisan ug si Naingue mismo maoy nitunol sa drugas dihang gipahigayon dayon ang pagsikop kaniya niadtong Hunyo 3.
Apan, dugang ni Maravillas, ang suspek nga dunay dala nga granada, napusilan sa kapulisan busa gi-admit sa Tuburan District Hospital.
Giingon nga duha ka mga pulis ang nagbantay kang Naingue apan kahibulungan kon nganong nakaikyas ang suspek bisan gipusasan kini.
Gibutyag ni Maravillas nga nakahigayon og tangtang si Naingue sa posas nga nahabilin pa sa iyang higdaanan sa ospital.
Padayon ang manhunt operation batok sa suspek nga nag-atubang og kasong o illegal possession of explosives ug ilegal nga drugas.
Samtang nakaeskapo usab si Raymond Veril, hamtong ang pangidaron, ulitawo, ug molupyo sa Purok Lubi, Sitio Fatima, Barangay Jubay, lungsod sa Liloan.
Matod ni PO1 Eden Pepito dihang nahinabi sa Sun.Star Superbalita kagahapon nga atol sa gipahigayon nga buy-bust operation sa Liloan Police niadtong Biyernes, pasado alas 9:00 sa gabii nasikop ang higala niini nga si Winchester Bardo aka “Tedted,” 24, apan nakahigayon og dagan si Veril ug padayon pa nga gipangita.
Nakuhaan si Bardo og 2 ka pakete nga gagmay ug medium size sa gidiling drugas ug nakadaiyang paraphernalia.
Padayon ang pagpangita sa kapulisan kang Veril samtang natanggong na sa Liloan Police Station si Bardo.