TUNGOD sa pagbukas sa usa ka dakong mall niadtong Biyernes, Mayo 12 sa dalan CM Recto-Osmeña ning dakbayan sa Cagayan de Oro, ang pipila sab nga mga kaatbang niining mga malls naghimo og laing mga pakulo aron dagsaon sab sa katawhan.
Sa pakisusi sa SunStar SuperBalita gidumog sa liboan ka katawhan ang SM Downtown Premiere atol sa pagbukas ug makita ang punsisok nga katawhan nga gusto masaksihan ang pagbukas niini.
Adunay mga promo ug palingaw nga gitanyag ang maong mall sama sa fashion show sa usa ka iladong boutique. Imbitado ang mga dagkong personalidad gikan sa nagkalain-laing TV Network sama nila ni KC Concepcion, Gabbi Garcia, Alice Dixson ug uban pa.
Wala sab nagpaulahi ang Centrio Ayala Mall diin pila lamang ka metros ang kalay-on gikan sa bag-ong bukas nga mall gumikan kay bagang dout sab sa katawhan ang misaksi sa ilang gitanyag nga mga kalingawan diin ilang giimbita ang mga celebrity gikan sa kaulohan.
Nag-perform ang Hashtag niadtong May 12 mismo, Asap live niadtong May 13 diin nasaksihan sa katawhan ang performance sa ilang idolong sila si Angeline Quinto, Darren Espanto ug uban pa.
Kagahapong adlawa gidumog sab ang Kagay-anong Pinoy Big Brother Winner nga si May-May Entrata kuyog ang iyang mga kauban sa balay nga sila Kisses, Edward ug Marco.
Duna usab discounted items nga gipamaligya ug dakong discount sab kagahapong adlawa atol sa kasaulogan sa Mother's Day.
Kung anaa sa SM Downtown Premiere si DJ Samir Ayeb aduna sab sa Centrio sila si DJ Khai Lim ug DJ Carlo Atendido.
"Nag-iyahay sila og pasikatay. Pero tsada lang kay healthy competition. Kita sab dani galibog asa mopaingon pero okay ra gihapon nalingaw man ta," matud ni Joralyn sa pakighinabi sa SuperBalita.
"Pirme unta ingon ani nga daghan artista," matud sab ni Seb.
Sa bagang dout sa katawhan walay puas sab ang paghatag og hugot nga seguridad sa kapolisan sa Cagayan de Oro City Police Office.