GIPASIDUNGGAN niadtong Mayo 12 ang mga sundalo nga nasamdan atol sa engkuwentro batok mga rebeldeng New People's Army (NPA), didto sa Camp Panacan Station Hospital, Barangay Panacan, dakbayan sa Davao.
Mismong si 10th Infantry Division (ID) commander Major General Rafael Valencia ang misab-it og mga medalya sa kaisog ug pagka-bayani sa mga sundalo nga nasamdan sa sunod-sunod nga engkuwentro batok mga NPA.
"The 10ID recognized the bravery and heroism of the wounded-in-action (WIA) soldiers who were involved in series of encounters against the communist terrorists (CTs) in Davao Region," mabasa sa post sa Facebook page sa 10ID.
Una niini, natigayon ang sunod-sunod nga engkuwentro sa tropa sa kasundalohan tali NPA sa miaging semana ug gikatahong duha ka rebelde ang namatay samtang usa ang patay sa militar ug narekober
ang mga tag-as nga armas.
Usa ka sundalo ang namatay, siyam ang angol ug patay sab ang usa ka Eleazar Templado, alyas Chin, usa ka political instructor sa PBC1 sa Calinan Proper, human naka-engkuwentro sa 3rd Infantry Battalion ang NPA ubos sa Pulang Bagani Company (PBC) 1 sa Barangay Dalagdag, Calinan District, dakbayan sa Davao, Mayo 10.
Niadtong Mayo 9 natigayon sab ang engkuwentro sa duha ka grupo sa Barangay Sumimao, Paquibato District diin namatay ang rebelde nga si Jojo Dagahoya, sa PBC1, sa Sitio Balinanao, Barangay Fatima, Paquibato District.
"We shall relentlessly pursue the anti-peace and anti-development nuisance propaganda army (NPA) of the communists who only make the lives of the Filipinos miserable," sulti ni Valencia. (JPC)