GITAKDANG sugdan na ang proyektong Deployment of Early Warning System (DEWS) sa mga lugar nga bahaunon sa Rehiyon 11, 12, ug 13 sa sunod bulan, Hunyo.
Usa ka tigum ang gihimo nga gipangunahan sa Department of Science and Technology (DOST)-Davao, Pag-asa-Davao, ug Advanced Science and Technology Insitute (ASTI) didto sa Ritz Hotel Garden Oases kagahapon aron nga ipasabot ang kabililhon sa proyekto sa seguridad sa tanang komunidad sa Pilipinas.
Kini gitambongan sa nagkadaiyang pangulo sa operasyon gikan sa Compostela Valley, Davao Oriental, Davao Occidental, Davao City, Davao del Sur, ug Davao del Norte, kon diin milagda sila sa ilang memorandum of agreement sa maong proyekto.
Gikanayon ni Assistant Project Leader of DEWS Engineer Oskar Cruz nga ang tumong sa proyekto mao ang pagmugna og komunidad nga motubag sa pahimangno nga gihatag sa DOST ug Pag-asa gamit ang Water Level Monitoring System (WLMS) ug Automatic Rain Gauge (ARG) nga na-instolar sa nagkadaiyang river systems ug secondary tributaries aron nga sukdon ang tubig ug lebel sa ulan nga gamiton sa pagprotekta sa kinabuhi, propedad, ug panginabuhi sa nagkadaiyang komunidad.
Dugang pa niya nga ang proyekto di mag-usab sa traditional flood management nga gitudlo ngadto sa mga komunidad apan maglig-on niini gamit ang kahimanan nga na-instolar sa mga sapa ug dalan aron sukdon ang lebel sa tubig.
Ang mga kahimanan nga gigamit sa DEWS project gipalambo sa mga enhenyerong ug sayantis nga Pinoy nga gisusi sa ASTI.
Gitin-aw ni Cruz nga ang maong early warning devices imonitor kanunay sa Pag-asa, DOST, ug ASTI aron nga maseguro ang kaepektibo niini.
Dunay kinatibuk-ang 17 ka munisipalidad ug siyudad sa tulo ka rehiyon nga kasamtangang kabahin sa proyekto samtang 9 lang ka mga kasapaan - Mabini, Nabunturan, Hagonoy, Magsaysay, Caraga, Cateel Tagum City, Panabo City, ug Davao City.
Sa Davao Region, sumala ni Cruz nga dunay 12 ARG's ug 6 WLM's nga iinstolar pa isip dugang sa nabutang na nga 82 warning devices sa Davao region samtang ang instolasyon sa Soccsksargen ug Caraga nagpadayon.
Gipasalig ni Cruz nga ang instolasyon sa mga kahimanan ubos sa DEW project sa Davao Region, Soccsksargen, ug Caraga magamit ug makompleto na sa Hunyo ning tuiga.
Dugang pa niini nga nagpadala na sila og hangyo ngadto sa national government alang sa pagpalugway og duha ka tuig ning proyektoha tungod sa hangyo gikan sa uban pang mga munisipalidad nga wala nalakip sa DEW.
Karon, flood drill sa Samuel Village, Barangay Lizada, Toril, Davao City gilusad sa pagpanguna sa DOST-Davao isip kabahin sa DEWS project ug pagseguro sab sa kaepektibo sa kahimanan. (BSC)