NAGTIMBAYAYONG sila Romeo Travis ug Chris Banchero aron alsahon ang Alaska Aces sa 101-95 nga kadaogan batok sa Barako Bulls atol sa 2015 PBA Governor's Cup niadtong Sabado sa gabii.
Nibira si Travis og 23 puntos, 14 rebounds ug lima ka assist samtang si Bachero nidugang og 20 puntos.
Napanas sa Aces ang 22 puntos nga biya nga naangkon nila pagsirado sa ikaduha nga kwarter, 62-40, apan nahimo nalang kini og usa nalang ka puntos, 71-70, sa 2:14 minutos nabilin sa ikatulo nga kwarter.
Nahuman lang gihapon ang ikatulo nga kanto sa 78-72 nga labaw sa Bulls.
Apan namugnaw ang Bulls sa kataposan nga kwarter diin natilawan sa Aces ang ilang una nga labaw, 82-81, sa 8:30 minutos gikan naglakag sa biya.
Napainat pa kini sa Aces sa ilang kinadak-an nga labaw sa dula nga siyam nga puntos, 95-86, sa 2:58 minutos nabilin sa kataposan nga kwarter.
Nidikit pa ang Bulls sa usa nalang ka punto nga biya, 95-94, sa kataposang 1:35 minuto.
Apan gikan dinha, ang tres ni Jayvee Casio sa 1:26 minuto nipalobo og upat ka puntos nga labaw nga wala natubag sa Bulls sa pagimpas sa oras.
"This may be the hardest game of the conference," asoy ni Aces coach Alex Compton sa ilang kadaogan. "I like how Romeo enlight his teammates."
Matod ni Compton nga napungan ni Travis si Bulls import Liam Paul McMorrow, nga nihuman og 26 puntos ug 14 rebounds.
"We just kept playing, kept playing defense," ingon ni Travis sa postgame interview sa TV5.
Nabugkos na ang Alaska sa San Miguel Beermen sa una nga pwesto nga adunay pito ka daog ug duha ka pilde matag usa, samtang ang Barako nagsolo sa ikatulo nga adunay unom ka daog ug tulo ka pilde.
Sa pikas bahin, naangkon sa Rain or Shine Elasto Painters ilang ikaupat nga sunodsunod nga kadaogan human nila napilde ang Purefoods Star Hotshots, 103-88.
Gikan ang Elasto Painters sa usa lang ka daog ug upat ka pilde bago niangat sa ikalima nga pwesto ubanan sa GlobalPort Batang Pier nga adunay lima ka daog ug upat ka pilde matag usa.
Ang Hotshots nahulog sa ikasiyam nga pwesto duyog sa Barangay Ginebra Gin Kings nga adunay tulo ka daog ug lima ka pilde.