PATAY ang usa ka sundalo dihang nabangga ang gimanehong motorsiklo niini niadtong Sabado sa gabii sa Barangay Patag, Dakbayan sa Cagayan de Oro.

Gi-ila ang biktima nga si Private 1st Class Exequil Caylaloan, residente sa Barangay Bonbon ning dakbayan.

Sa inisyal nga imbestigasyon sa Police Station 7 sa Bulua nasuta nga ang biktima paingon unta niadtong tungora sa Barangay Bulua dihang nabangga niini ang motorized sikad nga gimaneho usab ni Melchor Cabagat, taga Dakbayan sa El Salvador, Misamis Oriental.

Tungod kay head on sa panagbangga, dili tiaw ang kadaot nga naangkon sa biktima nga si Caylaloan ug maayong pagkabunal sa ulo niini.

Gawas pa nga nakaangkon og lain-laing bun-og sa lawas ang biktima hinungdan sa iyang hinanaling kamatayon.

Si Cabagat, nga detinado karon sa prisuhan, ang namugos nga siya maoy gibanggaan ni Caylaloan tungod kay misubay siya sa insaktong dalan.

Ang kaso gikatakdang iduso sa Road and Traffic Administration. (SVB)