POSIBLENG makasuhan ang suspetsado og robbery ug frustrated homicide human gitulis ug gidunggab pa ang mga biktima samtang nagbaklay niadtong Sabado mga alas 8:40 sa gabii sa Kapison, Kauswagan, Dakbayan sa Cagayan de Oro.
Ang managsuon nga mga biktima naila nga mao sila si Leden Domino ug Darry Domino, pulos lumulupyo sa Zone 6 susamang dapit.
Gihatod sa Barangay tanod ang suspetsado nga si Jonathan Sambalon, taga #26 Tikalaan, Talakag, Bukidnon samtang malampusong nakapalayo sa maong dpait ang kauban niini nga si Ejed Ontihan, residente usab sa Talakag, Bukidnon.
Subay sa report nga samtang nagbaklay sa nahisgutang dapit si Darry kalit kini nga gitionan og mahait nga hinagiban ug gipugos sa pagpahatag sa iyang cellphone apan nagdumili ang biktima hinungdan nga gisulayan kini sa pagdunggab.
Samtang niadtong higayona anaa sa tindahan ang igsoon niini nga si Leden hinungdan nga gitabangan niini ang igsuon sa dihang namatikdang gitulis kini sa maong mga suspetsado ug maoy nakaangkon og duha ka samad dinunggaban sa iyang tuo nga kamot ug wala nga bahin sa iyang kilid.
Nakuha gikan sa maong suspetsado ang kutsilyo nga adunay gitas-on nga 12 ka pulgada samtang ang kauban niini ang malampusong nakaikyas human sa maong insidente.
Ang maong suspetsado ang kasamtangang nagtingkagol na sa Maharlika Detention Cell (MDC) samtang nagpaabot sa kasong posible nga ipasaka batok kaniya. (KCS)