DUHA ka mga establisimento ning Dakbayan sa Cagayan de Oro ang gitulis diin gituohan nga susama ang mga responsable kinsa unang gikataho nga kong nakahigayon manglugos ug manghimas pa kini sa mga babayeng biktima.

Niadtong Biyernes mga alas 7:45 sa gabii gitulis ang 511 Store nga nahimutang sa Calamansi Drive Carmen ning dakbayan diin duha ka mga tindera ang gipanggapos ug gipasulod sa usa ka lawak.

Gimandan ang duha ka mga tindera nga mogawas lamang sa lawak human sa napulo ka oras.

Subay sa report sa Police Station 4 sa Carmen nasayran nga unang nagpatuo ang mga suspetsado nga kustomer ug nagpangutana sa presyo sa mga baligya.

Human sa pipila ka minuto, mibalik ang mga suspetsado dala ang kalibre .45 ug kutsilyo nga mao'y gigamit sa pagpanulis.

Nadala sa mga suspetsado ang mga mahalong butang sama sa 2 ka eye wear, usa ka pares sa shades, armored chest ring, 4 ka handcuff, 4 ka 511 nga belt, MA nga kutsilyo, cellphone, Emachine laptop, Combat, bag ug uban pa lakip na ang cash nga P6,100 diin mokabat ngadto sa P69,650 ang kantidad.

Ang mga suspetsado nga naka sul-ob og helmet ug sunglasses dali nga mipalayo sakay sa motorsiklo ug giguba pa niini ang maong Closed-circuit Television camera sa maong patigayon.

Samtang gitulis usab ang Don Berto convenience store sa C.M Recto Highway, Lapasan ning dakbayan niadton Sabado mga 2:30.

Nadala sa mga suspetsado ang isyu nga kalibre.38 nga revolver sa guwardiya nga si Bernie Sagario, ubos sa Junlin agency nga nga aduna'y unom ka mga buhing bala ug kwarta sa maong patigayon.

Gituohang susama ra ang responsable sa sunod-sunod nga pagpanulis gumikan sa pamaagi niini diin gi-ingong manggapos kining suspetsado sa mga biktima ug kon makahigayon panghilamon pa niini ang pribadong parte sa mga babaye nga biktima.

Si Police Chief Inspector Lemuel Gonda hepe sa Operation and Plans Branch sa Cocpo, mi-ingon nga ila na kining giimbestigahan apan pabiling wala pay lead kung kinsa ang responsable sa pagpanulis.

Sa pagkakaron padayon pa ang pagpahigayon sa kapolisan alang sa pagsugpo sa maong gituohang responsable sa sunod-sunod nga pagpanulis ning dakbayan.