NGANONG nabisto ang gitagoan sa duha ka nahabiling mga sakop sa Abu Sayyaf sa Pangangan Island sa Bohol?
Matod ni Police Senior Inspector Cresente Gurrea sa Calape police nga sila si Abu Asis ug Abu Ubayda nadiskobrehan human masum-ok duol sa langob nga ilang gitagoan ang tiguwang lalake ug anak niining bata nga lalake niadtong Lunes sa buntag samtang nanginhas.
Ang langob nga gitawag og Kastila Cave sa Brgy. Kahayag natabunan sa kabakhawan, duol sa baybayon.
Matod ni Gurrea nga niduol sa 70 anyos nga amahan ug anak ang duha ka mga terorista kay nangayo og pagkaon.
Aron seguradong mobalik sa dapit ang tiguwang lalake ug di mosumbong sa mga awtoridad, gipabilin ang iyang anak nila ni Asis.
Nagkuha ang amahan og pagkaon nga gihurot gilayon sa duha ka gutom nga mga sakop sa Abu Sayyaf nga nagtago sukad pa sa miaging semana sa isla human makakawat og bangka sa Calape.
Samtang nagkaon, gihangyo ang amahan nila ni Asis ug Ubayda nga tabangan silang makaeskapo.
Nipasalig ang amahan nga sila tabangan pinaagi sa pagpagamit sa iyang bangka apan, iyang gihangyo ang duha nga buhian sila sa iyang anak aron makaandam siya sa iyang bangka.
Nakombinser ang duha, gibuhian sila. Alan Tangcawan