WALA pa maila ang usa ka patay nga lawas nga napalgang naglutaw sa Cagayan de Oro river niadtong Sabado mga alas 6:30 sa buntag sa Zone 4, Carmen, Dakbayan sa Cagayan de Oro.

Ang patay nga lawas gibana-banang nagpangidaron og 40 ngadto sa 50 anyos, nagsuot og green nga t-shirt, jersey nga short pants kolor puti nga dunay itom nga kombinasiyon, aduna'y patik nga hulagway sa Ginoo sa tuo nga bahin sa dughan samtang sa wala usab nga bahin hulagway sa Mahal nga Birhen Maria ug laing patik nga cobra sa bagtak.

Subay sa report sa Police Station 4 sa Carmen nasayran ni Romnick Russel Aguiton ang patay nga lawas sa dihang napalgan kini nga naglutaw.

Girespondehan usab sa scene of the Crime Operatives Northern Mindanao (SOCO) sa pagpangulo ni Police Senior Inspector Christian Caballes ang maong insidente ug gibutyag nga walay nakitang mga samad sa patay nga lawas.

Ang patay nga lawas sa biktima gidala sa Bollozos Funeral Parlor sa Bulua alang sa posibleng pag-otopsiya niini aron masuta ang tinuod nga hinungdan sa maong kamatayon ug alang sa tukmang disposasiyon.