3 NPAs patay sa engkwentro

TULO ka mga gituohang sakop sa New People's Army (NPA) diin duha niini mga amazona ang nakabsan sa kinabuhi sa engkwentro nga nahitabo niadtong Biyernes sa Barangay Sampaguita, lungsod sa Kitaotao, Bukidnon.

Si Lieutenant Colonel Jessie Alvarez, hepe sa 403rd Birgade sa 4th Infantry Division (4ID) Philippine Army, mi-ingon nga ang engkwentro nahitabo dihang mipahigayon iyang mga sakop og operasyon human nasuta gikan sa mga residente nga adunay presensya sa mga NPA ang anaa milihok sa dapit.

Matod ni Alvarez nga gibutyag sa mga residente sa dapit nga tulo sa mga NPA ang nakabsan sa kinabuhi diin duha niini amazona nga miyembro sa Guerella Front 83.

Samtang lima usab ka mga sakop sa sundalo ang nasamdan apan gipaabot ni Alvarez nga dili angay ikabalaka tungod kay minor injuries lamang ug layo sa peligro.

Ang mga NPA mi-withdraw sa away samtang padayon pa ang paglusad og hot pursuit operation.

Mahinumduman bag-o lang naengkwentro sa mga sundalo ang mga sakop sa Guerella Front 53 diha sa Kibawe, Bukidnon diin usa sa sundalo ang nakabsan sa kinabuhi.