SA miaging Biyernes, gisaulog sa Pilipinas ang ika-117 ka tuig na nga kasumaran sa atong pagkagawasnon. Apil sa dakong kalihokan, mao ang pagpabarog sa bandera sa Pilipinas sa gikabangian nga Spratly Islands nga atong gitawag og West Philippine Sea.

Garbo ang atong gobyerno nga mi­pakawaykaway sa atong bandera sa West Philippine Sea aron sa pagpakita nga ang atong nasod adunay soberenya ug makapanalipod sa teritoryo.

Apan kutob ra tawon ta sa pagpa­kaway sa atong bandera sa Spratly ug wala tay gahom sa pagpakgang sa China nga padayong naghimo ug reclamation sa West Philippine Sea. Mga 800 na ka esktarya ang namugna nga reclamation sa China. Puwede na silang magtukod ug seaport, airport ug dakong palasyo sa China sa namugna nga reclamation.

Ang atong Philippine Coast Guard ug Philippine Navy dili makapalag kon abugon na sa mga dagkong barko igugubat sa China. Ang Philippine Air Force mabalhibuan kon sabay-sabayan na sa mga dagkong warplanes sa China.

Ang Pilipinas, China, Brunei, Malaysia, Vietnam ug Taiwan ang pulos nangangkon nga dunay dakong pahat sa Spratly. Apan ang init nga nagkasungi mao ang Pilipinas ug ang China.

Tungod sa pag-insister sa China nga ila ang mao nga lugar, ila kining ginganlan og South China Sea. Kita sa Pilipinas, atong gi­nganlan og West Philippine Sea. Ang mao nga kontrobersiya naabot na sa United Nations Tribunal on the Law of the Sea.

Ang Pilipinas dunay gihuptan nga mga 300 ka tuig na nga mapa nga magmatuod nga iya sa Pilipinas ang Spratly. Ang mao nga mapa gikan sa Heswitang pari nga si Pedro Murillo Velarde ug napublikar sa Manila niadtong tuig 1734.

Ang China mialegar nga naa sab silay ebidensya nga ila ang Spratly. Ang problema kay dili makahuwat ang China nga mahukman daan sa United Nations (U.N.) ang mao nga isyu.

Midiretso sila og mugna og reclamation sa Spratly.

Klaro nga nakaminus og maayo ang China sa Pilipinas. Nasakpan na nila nga mga kagang-kagang na ang atong mga barko igugubat. Ila nang nahibaw-an nga secondhand ug overpriced ang atong mga chopper. Wa malilong sa China nga ang atong mga armas mokagar kay ang mga maayo gipangbaligya sa mga opisyal sa kapolisan ug militar ngadto sa mga rebelde.

Kon naa man apan kuwang og respeto ang China sa Pilipinas. Maklaro nga kuwang sila og pagtahod ni Presidente Noynoy Aquino nga maoy Commander-in-Chief sa atong kasundaluhan

Ila nang gitag-an daan nga kon giyera, klarong wala tay dag-anan. Nagtuo ang China nga dili nato kaya nga manalipod sa kaugalingnan.