WA PA gani magklaro si Davao City Mayor Rodrigo Duterte sa pagdeklarar nga modagan siya sa pagkapresidente, nitumaw na ang taho nga patyunon siya sa mga druglords aron di siya kadagan. Unsaon pagdagan kon mamatay na?
Di ba siya man ang nanghulga nga iyang patyon ang tanan nga mga kriminal. “Kill them all,” matod pa niya sa usa ka interview. Mao bitaw na ang iyang giingong nga hinungdan nga ikasiyam ang dakbayan sa Davao sa labing luwas nga syudad sa tibuok kalibotan.
Mao kini ang nakaparat. Wa siya nagklaro kon modagan ba gyud siya sa pagkparesidente.
Pero magsigi siyag ingon nga kon siyay mapresidente, magtipun-og ang Manila Bay sa mga lawas sa kriminal ug manambok ang mga isda didto.
***
Masayon mo na nga kon usa ka libo pa lang ka mga kriminal ang napatay didto sa siyudad sa Davao, kon siya mao na ang presidente, hayan nga mosaka kini ngadto sa 50,000 o ba kaha 100,000. Ang mga sakop sa gang iyang balian sa bukog. Masayon mo na?
Unsaon pagsaka kon maunhan siya sa mga drug lords. Matod pa ni Emmanuel Piñol, ang kanhi gobernador sa North Cotabato, nakadawat silag “raw but reliable intelligence report” nga nagkahiusa na ang dagkong drug lords sa Luzon, Visayas ug Mindanao aron pagsanta sa laraw ni Duterte nga magpresidente.
Nag-una sa estratehiya sa drug lords mao ang pagpatay kang Duterte. Kon di mapatay, mogamit silag massive black propaganda ug paggamit sa ilang salapi sa kampanya batok ni Duterte.
***
Matod ni Pinol, ila nang gitambagan si Duterte nga dugangan ang iyang seguridad. Mao na ni karon, ang gikaintapan sa mga kriminal didto sa siyudad sa Davao, mahadlok diay sa mga drug lord? Mao na ni ang panahon nga magpakita si Duterte nga way siyay gikalisangan ug mosuroy siya sa tibuok nasod nga di magdala og bisan usa ka bodyguard.
Ang kinahanglan sa tingali niyang dad-on mao ang Viagra. “I can’t imagine life without Viagra,” matod pa niya. Kaniadto, matod pa ni Duterte, sa panahon sa atong mga ginikanan ug mga igsuon, kutob ra tawon sila sa edad nga 50, wa nay mahimo.
Pero karon, tungod sa Viagra, bisan 60 anyos o 70 anyos, mahimo pa. Nagplano gani siya nga hatagan og award ang Pfizer, ang tiggama sa Viagra atol umaabot nga Kadayawan. “I will give Pfizer an award,” matod pa ni Duterte. Mao kana si Duterte. Daghang mga kriminal nga nituskig. Sa Viagra lahi man maoy motuskig.