GRABE na ang pagsugod sa pagbukal sa kawa sa pulitika tungod sa paghan-ay sa direksyon sa mga partido sa pagdaog sa ilang kandidato sa nagkaduol nga eleksyon sa Mayo 2016. Dili mominos upat na lang ka buwan gikan karon, Oktubre ning tuiga, magsugod na ang mga kandidato sa pagsumiter sa mga sertipiko sa ilang kandidatura alang sa nasudnong posisyon ug mosunod ang mga lokal nga kandidato.
Ning higayona nagkaklaro na ang mga baroganan ug ambisyon sa mga politiko. Gawas sa una nang nasayran nga mokandidato sa pagka presidente mao ang nag-una gihapon sa mga ulahing survey nga si Bise Presidente Jejomar, kinsa gibato sa daghang akusasyon ug intriga, ug si Interior Secretary Mar Roxas sa administrasyon ubos sa Liberal Party (LP) apan, dili makadani ang resulta niya sa mga survey.
Dunay bag-ong nanggawas nga ngalan nga posible mokandidato sa pagka presidente ang paborito nga si Sen. Grace Poe, Chiz Escudero, Davao City Mayor Rodrigo Duterte ug uban pa. Segurado nga usa kanila posibleng mopaubos ngadto sa pagka bise presidente.
Sa lokal nga kalamboan, nagkainit ang realignment sa puwersa sa pulitika ug alegre sama sa piniliay sa Sugbo sa 2016 tungod sa hugonhugon nga si Tomas Osmeña mobalik sa pagpakig-atbang ni Mayor Michael Rama sa dakbayan sa Sugbo. Susama kaalegre ang nagsikit nga dakbayan sa Talisay, Mandaue ug Lapu-Lapu nga dunay kaugalingong kontrobersyal nga kahimtang sa pulitika. Sa lalawigan, si Gwen Garcia mobalik sa
pagka gobernador aron paghagit ni Gob. Hilario ‘Junjun’ Davide III?
Kining tanan hugonhugon pa lang ug kabahin lang sa pagbukal sa kawas sa pulitika, samtang wala pa ang matuod nga pagsumiter sa ilang kandidatura sa Commision on Elections (Comelec)