Mongaya: Mga bata ug motorsiklo

TINUOD kulba kaayo tan-awon kining mga motorsiklo nga nagsakay og mga gagmayng bata. Halos kada adlaw akong makakita niini diha sa SRP.

Apan, di sab malimod nga mao sab kini ang masakyan gikan ug padung sa mga tunghaan sa mga kabus labi na diha sa kabukiran.

Maayo lagi unta kon dunay mga tunghaan sa elementarya ug high school ang matag sityo. Bisan pag dunay tunghaan sa sentro sa barangay diha sa kabukiran, tinuod man nga mobaktas pa og pipila ka bungtod ang mga kabataan gikan sa mga layo nga sityo.

Kon nakatangas lang ki­ning mga magbabalaod sa mga hilit nga dapit sa kabukiran sa tibuok nasud, daghan kaayo ang halos dili masulod bisan og multicab.

Ang kasagaran nilang ma­sakyan mao ang mga motorsiklo. Mahimong gipanag-iya kini sa ilang ginikanan o mosakay sila og habal-habal.

Apan karong duna na kitay balaod nga nagdili sa mga pasahero nga di makatugkad sa yuta, di na mahimong ihatod sakay sa motorsiklo ang kabataan nga motungha.

Buot ipasabot, pasagdan lang kining mga bata nga naa sa elementarya nga baktason ang pipila ka bungtod mopadung sa tunghaan ug mopauli sa ilang balay.

Karong K2-12 na ang atong sistema, magsugod intawon sa pagtungha ang mga bata nga kwatro ngadto sa singko anyos.

Kon ihatod ug kuhaon kini sila sa ilang ginikanan kada adlaw, hunahunaa ang pila ka oras nga mawala sila sa ilang panginabuhi. Naghimo og ingon niini nga balaod ang mga nihampak apan wala maghunahuna og alternatibo.

Habal-habal

Wa ko makauyon niining pagkuyanap sa mga habal-habal sa halos lain-laing suok na sa Syudad sa Sugbo. Uyon ra unta ko niadtong alterna­tibo kini nga transportasyon diha sa kabukiran. Apan lahi na karong moabot na sila sa downtown ug sa SRP.

Tinuod man sab gyud nga kuyaw kining pagkuyanap sa mga habal-habal. Lalim bay makadaghan na ko makakita niini nilang murag way kulba nga molusotlusot sa atubangan sa mga nagdagan nga mga awto, van, o trak.

Alang kanako, dakong ta­bang alang sa mga kaigsuonan nato sa kabukiran kining habal-habal. Apan gikinahanglan dunay regulasyon aron dili kini sila moabuso. Ang nakaapan lang kay kon maghisgot kitag balaod, illegal baya kini sila kay wala may prangkisa.

Gipasagdan kini sila nga mo­kuyanap kay kon panakpon silang tanan, mawad-an sab og transportasyon ang dakong bahin sa atong populasyon.

Ingon niini unya ang akong malantawan niining balaod kabahin sa pagdili nga mo­sa­kay ang mga bata og mga motorsiklo.

Kay gikinahanglan man kini sa dakong bahin sa atong populasyon, di sab unya kini matarong sa pagpakanaog. Bunga lagi sa mabaw nga panghunahuna sa atong gitawag nga mga magbabalod.

(@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph