WA pa nasayri kung unsa nga eroplano ang giingong nahagsa sa utlanan sa Esperanza ug Bagumbayan sa probinsya sa Sultan Kudarat kaganihang' buntag, Hunyo 14.

Si Eastern Mindanao Command (EastMinCom) Public Information Office chief Captain Alberto Caber nagkumpirma gikan sa report sa 6th Infantry Division sa giingong pagkahagsa sa eroplano 11:30 Dominggo sa buntag human ang mga residente nakadungog og kusog nga buto sa dapit.

"Sibilyan yung nakarinig ng pagsabog ng eroplano. Pero hindi pa rin ma-confirm ngayon if anong klase ng eroplano yung nagcrash," ingon ni Caber sa pakighinabi sa Sun.Star Davao pinaagi sa telepono, kagahapon.

Giingon sab ni Caber nga ang 6th Infantry Division miresponde sa dapit human nila madawat ang impormasyon.

"Nag-organize agad ng search and rescue team ang 6th ID. Dineploy nila ang 33rd IB, 62nd DRC, 601st Brigade units nila," dugang ni Caber.

Ala 1:30 kagahapon sa hapon, subling nagpahibalo si Caber nga duna nay duha ka helicopter sa Armed Forces of the Philippines (AFP) gikan Cagayan de Oro City ang gi-deploy sa dapit aron mohimo og aerial survey sa dapit.

Tungod sa hitabo, daling mimugna og emergency meeting ug nagpahigayon og rescue operation ang Local Government Units (LGU) sa Esperanza ug ang Provincial Risk Reduction and Management Council (PDRRMC).

"Pero hindi pa rin ma-confirm if anong eroplano talaga and kung may casualty ba," sumpay ni Caber.

Giklaro ni Brigadier General Rodante Joya, officer-in-charge (OIC) deputy Director General for Operations sa Civil Aviation Authority of the Philippines (CAAP), nga walay passenger plane nga nahagsa, sanglit kompleto ang tanang pasaheroan nga eroplano human nila gisusi labot sa maong hitabo.

"As of now negative po na passenger plane. Nag-check na po tayo sa flights ng mga Airline companies at lahat po ng flights ay accounted," sulti ni Joya sa pakighinabi sa dZMM Teleradyo.

"Nag-chi-check tayo ngayon if light plane na galing sa mga maliliit na airpad na hindi na controlled natin. We are still waiting for further information for the confirmation of the plane crash incident," ingon ni Joya.

Sa pinakaulahing report ni Francis Canlas, reporter sa dZMM Teleradyo, nga nagpahigayon na sab og follow-up operation ang kapulisan sa bukirang bahin sa Barangay Esperanza.

Sa laing pakighinabi, gibutyag ni Captain Jo Anne Petinglay, spokesperson sa Division Public Affairs Office (DPAO) sa 6th ID, nga ila na sab nga gisubay ang dapit.

"We received a report earlier about a plane crash incident in Barangay Esperanza in Sultan Kudarat. As of now, hindi pa namin ma-confirm but we have our units deployed in the area to confirm it," sulti ni Petinglay.

"Until we can confirm that the plane crash really happened, we still consider the information as premature," sumpay sa opisyal.

Si Lieutenant Vergel Lacambra, spokesperson sa 10th Infantry Division sa Philippine Army naglusad sab dayon sila og pagpanubay sa dapit aron kompirmahon ang hitabo.

"As of now, wala pa kami na-receive na report na may nag-crash na eroplano. Hindi na din kasi sakop o area of responsibility (AOR) natin but we are still coordinating with 6th ID for the confirmation of the report," ingon ni Lacambra.

Sukad sa pagsuwat ning balita, wa pa nasayran kung unsa nga eroplano ang nahagsa sa maong dapit.