University of Mindanao nakakuha'g 7 sa top 10 LET Exam

PITO ka mga estudyante nga garbo gikan sa University of Mindanao (UM) sa Davao Region ang nag-top sa March 2017 Licensure Exam for Teachers (LET) nga gipagula sa Professional Regulation Commission (PRC) Lunes.

Ang top 1 mao si Marian Kaye Fortinez Gallego gikan sa UM Davao City nga dunay 92.8 porsiyento rating ug gisundan ni Acejan Lascuña Jadie gikan sa De La Salle University Dasmariñas nga dunay 92.6 porsiyento rating.

Gawas kang Gallego, laing unom pa ka mga estudyante gikan sa UM ang nakarga sa top 10 nga mao sila Gerlie Tampos Albia gikan sa UM Digos nga anaa sa top 5 kinsa nakakuha og 91.4 porsiyento; Rosa Mae Salazar ug Chrestine Torrejos pulos naa sa top 6 nga dunay 91.2 porsiyento, Leslae Kay Mantilla naa sa top 7 kinsa dunay 91 porsiyento, Kristine Clarrisse Planas, ang top 8 nga nakakuhag 90.6 porsiyento, ug Mark John Pepito mao ang top 9 nga dunay 90.4 porsiyento.

Bisan sa gidaghanon sa nag-top gikan sa UM, ang maong tunghaan wala maapil sa top performing schools base sa gidaghanon sa examinees ug gidaghanon sa mipasar.

Ang University of the Philippines Diliman maoy topped sa listahan diin 62 sa 67 ka examinees mipasar sa maong exam, samtang ang University of Sto. Tomas maoy ika-duha diin 51 sa 63 ka examinees ang mipasar. (Ben Tesiorna/Jeepy Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph