NANIGBAS ang manghod nga adik sa iyang maguwang sa way tinong hinungdan didto sa Hangar Road, Barangay Basak, dakbayan sa Lapu-Lapu kagahapon sa buntag.
Ang biktima mao si Russel Visperas, 42, minyo, samtang ang manghud nga suspek giila nga si Alfredo Visperas, 30, way trabaho ug parehong lumolupyo sa dapit.
Matod ni PO2 Jomar Florentino sa Homicide Section sa Lapu-Lapu City Police Office (LLCPO) nga atol sa insidente mga alas 9:00 sa buntag, adunay gipangutana ang suspek sa iyang maguwang kinsa nipahuway ug mitan-aw og TV niadtong tungora.
Apan wa kini tagda sa maguwang nga mipahuway sa ilang sala.
Si Alfredo, saysay ni Florentino, miadto sa luyong bahin sa ilang balay ug sa pagbalik niini aduna na kini dala nga sundang.
Sa way tinong hinungdan, gitigbas niini ang iyang maguwang sa makadaghang higayon rason nga nakaangkon kinig dagkong samad tinigbasan sa walang kamot ug ulo.
Daling gidala sa Mactan Doctor’s Hospital si Russel samtang si Alfredo daling gisikop sa mga sakop sa Station 4 sa LLCPO.
Si Alfredo, kinsa kasamtangang gitanggong sa prisohan gikatakdang pasakaan og kasong frustrated murder ni Florentino.