ANG Lady Knights FC, Real Digos FC ug Ateneo- Blue ang mihari sa ilang tagsa ka dibisyon sa Davao Football Association (DFA) Independence Day Football Festival nga gidula didto sa Tionko niadtong Sabado.
Gipildi sa Lady Knights ang SOS Davao FC, 3-0 alang sa girls 16 and under samtang ikatulo ang PCT Medvil human midaug batok Pantukan, 1-0.
Sa boys 16 & under, midaug ang Real Digos human nakapuntos sa penalty shootout, 1-0 kontra RMC tim.
Samtang nakuha sa Mintal Interage FC (MIFC) ang ikatulong puwesto dihang wa gipa-iskor ang Sakya FC-A, 1-0.
Mikampeyon ang Ateneo Blue sa Boys 14 & under human gipayakbo ang PCT tim, 3-1 aron mabutang kini sa ikaduhang puwesto ang kontra.
Ikatulo ang Real Digos FC sa maong dibisyon dihang midaug batok CBNHS, 1-0.
Ang men's ug women's open division sa kasamtangan ginaduwa sa pagsulat niini balita.
Ang torneyo gisuportahan sa Phillippine College of Technology, Medvil Farms Inc., Hyenas FC ug GHT Water Refilling Station and Laundry Shop.(Marizz S. Robilla)