BISAN og wa pa mopahibawo si Davao City Mayor Rodrigo Duterte nga magpapili siya pagka presidente sa umaabot nga eleksyon sunod tuig, mga inila ug tinahod nga artists sa nasod ang nipadayag na sa ilang suporta ngadto kaniya.
Sila nagtuo nga kon modaog pagka presidente si Duterte mabanhaw og balik ang kalagsik sa kultura ug sining sa nasod nga matod nila napasagdan na sa Malacañang sud sa pipila na ka dekada.
Sa panagtagbo nga nahitabo sa Club Filipino de Cebu sa niaging semana, ang mga artist nga sila si Hermes Alegre, Raul Lebajo, Romulo Galicano, Fidel Sarmiento, Nune Lucio
Alvarado ug Deste Robles niitsa sa ilang suporta kang Davide.
Kapin sa 70 ka mga artist ang niapil sa panagtapok ug nipadayag usab sa ilang suporta kang Duterte.
Ang ilang grupo gitawag og DoArt Du30, nga gipaluyohan sa gatosan ka mga artist gikan sa Luzon, Visayas ug Mindanao.
Matod ni Alegre, painter gikan sa Manila, nga katapusan siyang nibotar niadtong panahon ni kanhi presidente Fidel Ramos ug kon modagan pagka presidente si Duterte, mobotar siya og balik sa 2016 presidential elections.
Si Galicano, chairman ug founder sa Portrait Society of the Philippines, niingon nga gipasagdan na sa kasamtangan ug nangaging administrasyon ang kultura ug sining sa nasod nga katapusan nilang nasinati niadtong panahon ni anhing presidente Ferdinand Marcos dihang ang asawa niini nga si Imelda Marcos ang nipatukod sa Cultural Center of the Philippines.
Si Sarmiento, presidente sa Art Association of the Philippines, namahayag nga wa sila makabati og suporta sa kasamtangan nga presidente, sukwahi sa mga atleta ug singer nga buhong sa suporta ug pag-ila nga sugaton pa sa gobiyerno sa tugpahanan.