MAKALIBOG ang tinuod nga trabaho sa Civil Aviation Authority of the Philippines (CAAP) sa pagkumpirma sa mga insidente sama sa pagkahagsa sa mga abyon.

Makasulti kita niini tungod kay gilimod sa maong buhatan ang insidente sa pagkahagsa sa usa ka abyon didto sa Esperanza, Sultan Kudarat, alas 11:00 pasado sa buntag kagahapon, Dominggo.

Alas 3:00 sa hapon, giingon sa opisyal sa CAAP nga tanang eroplano sa dagkong flag carrier sa nasud ilang gitawagan, apan accounted ang tanan nilang eroplano, busa dako ang iyang pagtuo nga di tinuod ang report.

Apan, giingon sa opisyal nga kung tinuod nga dunay nahagsa nga eroplano, apan di na sakop sa ilang hurisdiksyon.

Ang nakapakurat mao ang pahayag sa on duty personnel sa CAAP Davao nga nagsulti nga nakadawat sila og taho, apan nag-monitor pa sila sa telebisyon basin makakuha sila og impormasyon.

Giingon sab niya nga di sila makahatag sa numero sa CAAP sa Gensan o kaha Cotabato City.

Ambot unsay ilang rason.

Samtang gihinabi ang CAAP Gensan, giingon sa on duty personnel nga nakadawat sila og report, apan nagpaabot pa sila nga motawag nila ang ilang opisyal.

Hinuon, masabtan nato ang ilang limitasyon apan ang di lang maayo nga paminawon ang pagka-walay-klaro nga paagi unsay maayong himuon sa pagkalap sa mga mahinungdanon nga impormasyon ilabina sa mga trahedya sa kahanginan.