PADAYON ang pagpamupo og kadaugan sa 17-anyos ug kanhi Sun.Star Superba­lita 9-Ball Challenge champion Anton Raga sa natad sa billiard human nalangkat na usab niya ang kampiyonato sa 2015 Mayor Aljun Diamante 10-Ball Championships nga gipahigayon sa Cebu Technological University (CTU) campus sa lungsod sa Tuburan.

Si Raga mibuntog ni kanhi world champion Ronnie Alcano, sa kulbahinam nga 11-10, aron iluklok ang P100,000 nga ganting salapi sa maong torneyo nga gitumong isip kalihukan sa kapistahan sa lungsod.

“Ako di man gyud ko hilig aning billiard, pero nakita nako nga daghan kaayong mga kabatan-onan nga gusto kaayo aning duwaa. Unya mao sab ni usa sa sports nga di ta mabintahaan bisan pa sa international competition. So bahala na og makagasto ko sa akong kaugalingong kuwarta basta lang malipay ug makatabang ta pag-develop ning duwaa,” matod ni Mayor Diamante.

Paghatag og dugang kaikag, giimbitar usab ni Diamante ang nailang Michael Jordan sa billiard nga si Efren “Bata” Reyes alang sa usa ka exhibition game batok ni Alcano ug ingon man batok ni Raga.

Aron pagtuman sa iyang saad, si Reyes nga gikan sa Singapore nga misalmot sa SEA Games ang milupad gilayon pauli sa Pilipinas ug mideritso dinhi sa Sugbo.

“Dako’g impact ang presensiya ni Efren “Bata,” kay kadtong mga bata dinhi sa Tuburan nga permi lang makakita sa ilang idol diha sa TV, ila nang nakita personal. Dili lang ang mga bata kadto na usab nga mga hamtong nga mga fans sab ni Efren “Bata,” dugang sa mayor. JBM

KAMPYON. SI Tuburan mayor Aljun Diamante (wala) ug vice-mayor Danny Diamante (tuo) maoy personal nga mi-award sa mga midaog sa Tuburan Mayor 10-Ball Open Invitational. Sa hulagway gikan sa wala, Mayor Diamante, Mark Malayan (4th), Ronnie Alcano (2nd), Anton Raga (kampiyon), Raykner Espejo (3rd), representante sa Pagcor, ug vice-mayor Danny Diamante. (TAMPO NGA HULAGWAY)