DALI kaayong mingsanong ang pipila ka mga politiko dinhi sa Kabisay-an nga sila uyon nga mag-martial law sab dinhi sa atua bisan pa man og ang Isis tua lang nagkutaw og kagubot sa Syudad sa Marawi sa Mindanao.
Nagpasipsip dayon sila kang Presidente Rodrigo Duterte. Niingon man gud ang presidente nga basin iapil niya ang Visayas ug ang Luzon sa deklarasyon nga martial law.
Apan di ba sakto kining awhag ni Mayor Tomas Osmeña nga mokonsulta una si presidente sa mga lokal nga mga opisya dinhi sa Visayas kon gikinahanglan ba ang martial law sa atua?
Alang kanako man gud, ang mahinungdanon mao ang pagbuhat sa labing maayong paagi pagbatok sa mga teroristang Isis nga naa karon sa Syudad sa Marawi.
Ang nakalahi sa atua man gud kay mayorya sa mga lumolupyo sa Marawi kay mga Muslim. Kasagaran kanila mga kabos. Ug taud-taud na gyud nga naglumlom uban kanila ang mga Isis.
Kon sa tanom pa, tambok ang yuta nga gitamnan mao nga nigamot sa pagmaayo. Apan lahi ang kahimtang sa Syudad sa Sugbo. Gawas nga mayorya dinhi mga Kristiyano, hugot sab ang relasyon sa atong mga opisyal sa City Hall ug ang Muslim community.
Mao kini ang gipakita ni Mayor Osmeña karong bag-o dihang nibisita kaniya ang mga lider sa lokal nga Muslim community.
Samtang nasuweto si Presidente Duterte sa kahimtang sa Mindanao ug dinalian ang aksyon batok sa Isis diha sa Marawi, lahi ang kahimtang sa Kabisay-an labi na sa Sugbo.
Gawas pa, sensitibo kitang mga Sugboanon sa martial law tungod sa nahitabo kaniadtong diktadurya ni Marcos.
Kahinumdoman, ang Sugbo mao ang nagpabiling lig-on nga nagbarog alang sa demokrasya panahon sa diktadurya.
Gani, lakip silang anhing Serging Osmeña ug Serge, ang amahan ug igsuon ni Tomas, ang gilutos kaniadto. Ang amahan ni Gob. Junjun Davide usab ang usa sa mga lig-ong lider sa oposisyon niadtong panahona.
Angay lang nga konsultahon ni Presidente Duterte ang Sugbo.
Alang kanako, di sab mopugos sa martial law dinhi sa Sugbo kay, basi sa iyang gipakita sa pagklakaron, dili man siya usa ka diktador sama ni Marcos kaniadto.
Pananglitan, niyukbo si Presidente Duterte sa Kongreso ug wala kini gi-abolish sama ni Marcos.
Bisan pa man, gikinahanglan ang pagbantay kay di baya gyud kita makasalig nga nausab na ang kapulisan ug kasundaluhan.
Wa pa kita makalimot nga nihilak mismo si PNP Chief Ronald ‘Bato’ dela Rosa tungod sa mga kabuang niining mga scalawag nga pulis.
Samtang ang sa kasundaluhan, bag-o lang kitang nagbantay mismo sa kahimtang sa bugas sa atong nasud dihang nalawgaw kini tungod sa kalaki sa kanhi sundawo nga administrator sa National Food Authority (NFA).
Lalim bay iyang gisupak ang mando mismo sa NFA Council ug gikinahanglang si Presidete Duterte mismo ang mo-intervene aron lang kini matarong pagbalik. (@anol_cebu sa Twitter)