LAHI sa 1972 dihang nagpahigayon og “ambush me” si Juan Ponce Enrile isip hinungdan nga mapakanaog ang martial law, dili hinimo-himo kining pagsiaw sa mga sakop sa Isis diha sa Syudad sa Marawi.
Tinuod ang sinukliay sa bala diha sa Marawi tali sa kasundalohan ug kining mga terorista.
Gani, nagkahiusa na man ang lain-laing mga grupong fundamentalist diha sa Mindanao kay gustong magpa-recorgnize sa Isis didto sa Iraq ug Syria.
Buot ipasabot, samtang diha niulbo ang kagubot karon sa syudad sa Marawi, mas dako-dako ang dapit nga nahulga niining maong grupo.
Basi sa atong nadunggan sa kalaki sa Isis didto sa Iraq ug sa Syria ug kining mga grupong nagpapayong sa Isis dinhi sa Mindanao, gipalabwan niining mga tawhana ang klase sa giingong mga terorista nga atong nahibaw-an pipila ka tuig nga milabay.
Mao kini sila ang hilig nga mamunggot og ulo sa ilang mga dinakpan lakip na mga Muslim.
Lahi ang fundamentalist Islam isip tinuhoan nila kay wala makauyon niini ang kasagarang mga Muslim.
Sa akong nabasahan, kining Islam usa ka malinawon nga relihiyon. Gani, daghang mga iladong tawo sa kalibotan mga Muslim sama ni Muhammad Ali, Kareem Abdul Jabbar, lakip si Cat Stevens, ang nag-compose ug nagkanta sa akong paborito nga “Father and Son.”
Apan ang mga sakop sa Isis nagtuo nga ang grabing kagubot maoy saktong pagduso sa ilang relihiyon.
Gamay ra man kini sila. Gani mas daghan man ang mga sakop sa MNLF ug ang MILF nga wala makauyon niining Isis.
Maayo na lang kay si Presidente Rodrigo Duterte taga Mindanao ug dunay dugo nga Muslim. Makasabot siya sa kalainan sa mga extremist ug kining mayorya sa mga Muslim.
Di gani siya pareho ni President Donald Trump sa Estados Unidos nga giisip nga di gustong modawat sa mga refugees gikan sa mga nasud nga Muslim.
Ang nakaapan lang sab niining ato sab nga mga kaigsuonan nga makakita lang gani og Muslim dinhi sa atua magtuo na man nga kini mga sakop sa Maute. Palihog lang ayaw sa pagpasa sab dayon og mga hulagway sa mga Muslim nga bisan og mga tarong sila, ato lang sab dayong nganlan og Maute.
Bisan pa man, gusto lang nakong ibalik sa pagsulti usab nga komplikado ang kahimtang ug lakip niini mao ang atong kapulisan ug kasundalohan nga wala pa sab gyud mareporma.
Di kita angayang mahadlok sa martial law ug sa militar. Kon mag-abuso man gani sila, duna kitay taas-taas nga kasinatian batok sa mga abusado.
Tinuod dili perfect ang kahimtang ug dili sab perfect ang solusyon nga martial law.
Apan sa pagkakaron, nag-atubang kita niining hulga nga maingon nato nga unprecedented. Ang Isis taud-taud na nga nakagamot diha sa Syudad sa Marawi. Kining ilang bangis pamaagi di mahimong atong atubangon ginamit ang mga paaging malinawon.
(@anol_cebu sa Twitter)