USA ko sa mga unang nilinya sa “Jurassic World” ug wa ko magmahay kay sama sa classic series nga Jurassic Park tugob gihapon ni sa aksyon, kulbahinam ug makalingaw apan makapakitbi sa atay nga mga esena.

I’m sure sama nako ang kinabag-an sa masang Pinoy excited motan-aw sa Jurassic World dili aron himbisan kon unsa ka intelihente pagkahimo sa estorya, kundi tungod kay ganahan tang balikan ang atong pagkabata nga bation og kamaya magtan-aw sa mga dinosaur nga gihatagan og kinabuhi sa puting tabil, diin ato silang makita nga manggukod, manglupad ug mokaon og mga tawo.

Mas detalyado

Ug dinhi nagmalampuson ang Jurassic World kay mas detalyado karon ang ilang presentasyon sa dinosaur.

Human sa 14 katuig sukad sa katapusan nilang installment niadtong 2001, way duda mas triple kanindot karon ang special effects tungod sa bag-ong teknolohiya nga makita sa ilang bag-ong hybrid nga mga dinosaur nga gitawag og Verizon Wireless Indominus rex.

Well, ayaw lang pag-expect og mga rich in character or deep and thought provoking experience nga drama, kay dili man gyud na maoy forte aning salidaha. Just enjoy, sit back and be amazed sa superb animation sa Jurassic World.

Nakahilak?

Uy dunay chika.. unsa kaha katinuod nga nakahilak ang usa sa mga sakup sa The Power Trio atol sa show nila sa Toledo City sa miaging semana?

Tungod sa usa ka babaye nga giingong namugos nila nga pabalhinon sila og laing dressing room kay si Daniel Matsunaga kuno ang naka-assign sa maong lawak.

Bisan kunog giunsa pagpasabot nga ang The Power Trio ang usa sa main performer sa maong show ug ang ilang Mommy Aida Patana ang miimbitar ni Daniel sa Toledo, wa gyud kuno mokihol ang babaye.

Imo unta tong gipiktyuran ang babaye, Alan Tangcawan. Wa diay silay production staff or stage manager didto aron malikayan ang miscommunication?

Anyway, congrats sa The Power Trio isip the main performer sa Michel’s Wine Night and Fashion Show karong June 26 sa Liv Super Club, diin lakip sa mga celebrity guests mao silang Jennifer Lee, Ethel Booba, Jeric Raval, ug ex-PBB housemate Manolo Pedrosa.

Sila na gyud?

Sa Cebu presscon sa pelikulang “Just The Way You Are” niadtong Biyernes, si Liza Soberano nibutyag nga inig debut na niya sunod tuig sugton si Enrique Gil.

Ang 17-anyos nga Fil-Am actress nitug-an nga nag-estorya na ang iyang daddy ug si Enrique bahin sa plano sa actor nga manguyab ni niya inig patong niya sa edad nga 18. Mao sab ni ang ilang tubag sa guesting nila niadtong Dominggo sa “Gandang Gabi Vice” nga duna silay something.

Basaha ang atong Q and A ni Liza ug Enrique ugma nga mogawas sa Super Ka! ug kamoy judge kon dili ba ni publicity stunt ra sa ilang Just The Way You Are movie nga showing na ugma, June 17 in over 100 theatres nationwide.