WA makapugong ang kampo ni Bise Presidente Jojo Binay sa pagpahigayon og protesta diha sa ilang balwarte sa Makati sa pipila ka gatos pinangulohan nilang Jim Paredes, Cynthia Patag, ug Leah Navarro.
Tuyo niining mga artista mao ang pagpakgang niining paglansar ni Binay tungod kay kon modaog kini sa pagka presidente, ang makaloluoy mao ang Pilipinas.
Basi lang sa mga alegasyon nga giimbestigar sa Senado ug naa na karon sa Ombudsman, pundo alang sa hospital gikawat. Naay pundo alang sa Pamantasan ng Makati, gikawat. Manghatag man og mga cake alang sa senior citizen, grabi sab ang patong.
Ug diin padulong ang kwarta? Gigamit alang sa pagpalit og usa ka hacienda? Gigamit alang sa pangampanya?
Bisan pa man sa mga imbestigasyon lakip na ang pag-freeze sa iyang mga bank accounts, lisud pahunongon si Binay sa iyang tinguha. Nakahunat na man gud kini ug atong masabot nga dako-dako na gyud ang iyang nalunod sa maong ambisyon.
Nagtuo ko nga mopadayon kini bisan pa man og danag na ang iyang pagdagan.
Tungod niini, nagtuo ko nga ang mahinungdanon karon mao ang pagpili og mga kandidato nga maoy makapakgang kang Binay.
Ug makapabalaka kining kahimtang nga daghan ang posibleng kandidato nga makapabahin-bahin sa kampo nga nagbatok sa giingong pangurakot ni Binay.
Magkahiusa?
Dunay malaumon nga magkahiusa ra kining mga anti-Binay nga mga grupo labi na kay di moatras ang bise presidente sa pagkab-ot sa iyang tinguha nga makatungtong sa Malakanyang.
Malaumon sila nga magkahiusa ra unya ang kampo nilang Sen. Grace Poe ug DILG Secretary Mar Roxas.
Sa akong pag-aninaw sa nasyonal nga kahimtang sa politika, depende na kini sa abilidad ni Presidente Aquino nga makakumbinser sa kampo ni Sen. Poe nga mosugot nga mahimong kandidato alang sa pagka bise presidente ni Roxas.
Sa pagkakaron hinuon, daghan sab ang nag-awhag ni Poe nga modagan pagka president sama nilang Senador Serge Osmeña, Chiz Escudero, nga sakop sa Nationalist People’s Coalition (NPC) ug kining Akbayan Partylist.
Igo na ba ang makinarya niini nga makapadaog og presidente? Usbon ko ang punto nga di ba lang masayang hinuon ang pagdagan ni Poe ug mahitabo ang sama sa kang Miriam Santiago kaniadtong 1992?
Kaagi
Si Miriam ang labing popular nga kandidato niadtong tungora apan si Fidel Ramos ang anointed ni Presidente Cory Aquino.
Sa piliay sa 2004, nagtuo ang oposisyon nga makadaug si Fernando Poe Jr., ang amahan ni Grace Poe, basi lang sa popularidad.
Wa mailhi ang provincial leader ni Poe dinhi sa Sugbo samtang ang kang Presidente Gloria Macapagal-Arroyo mao tulo ka mga nagkabanging mga dagkong makinarya ni Gwen Garcia, Johnjohn Osmena, ug Junie Martinez.
Hinuon, di nato matag-an pa ang mga panghitabo gikan karon hangtod sa Oktubre nga maoy deadline unya sa pagsang-at sa mga certificate of candidacy.
Gawas kang Poe, duna pay uban nga mga posibleng mokandidato sama kang Mayor Digong Duterte sa Syudad sa Davao ug si Sen. Bongbong Marcos.
Lain sab nga konsiderasyon labi na niining eleksyon mao unsa kon si kinsa ang suportahan sa Estados Unidos. Basi sa kaagi sa atong nasud, ang mga presidente nga dunay pagsuporta sa maong nasud mao ang modaog.
Hinuon, matod pa sa pipila, dunay higayon nga nasayop ang Estados Unidos ug mao kini kanidtong 1998 dihang nidaog si Erap Estrada pagka presidente. (@anol_cebu sa Twitter)