ANG mga pangbato sa Dabaw mao'y midominar sa gihimong 2nd Mayor Topoy's MTB Circuit Challenge didto sa Montevista niadtong Dominggo.

Mihari si Ronnie Urdaneta batok nila Ireezbone Barrientos sa Amas Kidapawan ug Raul sa Dabaw sa 8 elite/expert category nga naglumba sa napulo ka kilometro.

Nabulsa ni Urdaneta ang premyong P3,000 ug medalya samtang

P2,000 ug P1,000 ang nakuha nila Barrientos ug Raul sa maong han-ay.

Nagpasalamat si Ronnie sa iyang isponsor nga Taokas Philippines ug Ridea Bike shop Gmall.

Mikampeyon ang Dabawenyong si Eric Dave Apinar sa fun ride A category kontra sa laing taga-Dabaw nga sila Marven Villancio ug Melchor Labaya Jr. kinsa ikaduha ug ikatulo sa maong han-ay.

Sa Funride B Category, pulos Dabaw ang tulo nga nanguna nga mao sila Marcial Catangue, Danny Tapao, ug Joel Ganeco samtang sa Junsen Category, midaug sab si Jomar gisundan ni Eric Dave Apinar ug ikatulo si Reymart Legasan nga pulos taga-Davao.

Ang mga midaog sa fun ride A ug B mibulsa og P1,000, P700 ug P500 samtang sa junsen category dunay P1,500, P1,000 ug 700 sa tulo nanguna.(MARIZZ S. ROBILLA)