BAG-O. Dunay bag-ong termino sa kurakot - “innovative” (pagpamag’o). Matud pa ni Bise Presidente Jejomar Binay sa iyang interbyo sa medya “I’m not corrupt, just innovative” (di ko kurakot, makamao lang ko modala sa pagbag-o).
Manong, wa ka kyapi?
Gibasol ni VP Binay ang katilingban nga nagtuo nga usa siya sa mga opisyales nga kawatan nga naghupot og hataas nga posisyon sa atong kagamhanan ning atong nasud.
Abogado ka, Torni Binay? Di ni pagdaut sa atong propisyon apan di kalikayan nga madahig ta sa komedya tungod ning usa ka abogado nga bise presidente nga lihay kaayo sa isyu nga binilyon ang nakurakot sa Makati city parking building.
Gani, bisan pa sa alegasyon nga korapsyon ug plunder nga iyang giatubang duna pay nawong mosulti si Binay nga kon modaug siya pagka presidente iyang ipadayon ang programa ni Pres. Noy Aquino sa paggukod sa mga kurakot sa kagamhanan.
Miingon si Binay sa interbyo didto sa Luneta hotel sa Manila nga “aalisin ko ang mga sige sa pa rin sa graft and corruption ngayon pero hindi naman si Pangulo (Presidente Aquino) kasama diyan”. Iyang gipaganahan og estorya basin og mausab pa diay ang hunahuna sa Presidente.
Apan sa iyang interbyo didto sa Polillo island niadtong Independence Day (June 12), gipasingitan ni Binay si Presidente Aquino tungod sa kiha nila ni Sen. Juan Ponce Enrile, Jinggoy Estrada ug Bong Revilla.
Pung pa ni Binay “sana ako ay makilala na isang pangulo na hindi nagging vindictive, isang pangulo na matataguriang unifying president.”
Matud pa ni Binay nga usa kuno mosulti nga ipapriso o dili ang usa ka suspetsado tan-awon sa og maayo ang ebidensya. Mora man og ang iyang kaso ang iyang gipasabut sa katawhan.
Gibirahan ni Binay si Presidente Aquino, sama ni Sen. Grace Poe, dihang giklaro sa Liberal Party (LP) nga nagdamgo si Binay nga matudlo ni Presidente Aquino nga opisyal nga kandidato pagka presidente bisan dili siya LP.
Grabe ang pangandoy ni Binay nga mapresidente ning atong nasud kay iyang gigamit ang tanan pamaagi aron maguba ang LP ingon man si Senador Poe nga misaka og maayo ang papolaridad.
Atong huwaton unsa na say gimmick ang pundok ni Binay aron pagtabon sa mga isyu nga korapsyon ug plunder batok kaniya.
KIHA. Morag sunod tuig pa maimplementar ang giplano nga demolisyon sa mga balay nga naa nahimutang kilid sa sapa diha sa dakbayan sa Sugbo bisan og motabang pa ang DENR. Ngano? Tungod kay duol na kaayo ang piliay sa Mayo 2016.
Basin mokiha na usab si kanhi mayor Tomas Osmeña sama sa iyang pagkiha ni Rachel Arce, ang hepe sa ProbeTeam sa dakbayan sa Sugbo, human gidemolis ni Arce ang mga balay sa mga eskwater kilid sa dalan.
Nagtuo sad ko nga kon ipadayon ni Tinago Barangay Kapitan Joel Garganera ang pagdemolis mokiha si Tomas aron makuha ang suporta sa mga eskwater labina kay mideklarar na siya nga modagan pagka mayor sa Mayo 2016 batok ni Mayor Mike Rama.
Gipalusot na lang ni Joel nga iya sa ipa-survey usa aron mahibaw-an ang mga utlanan sa yuta. Ang balaod naglatid og tulo (3) ka metros nga distansya gikan sa kilid sa sapa o pangpang ang dili matukoran og balay o bisan unsa nga estraktura.
Ang DENR miboluntaryo sa ilang mga surveyor nga maoy modeterminar sa utlanan sa mga yuta nga duna nay mga balay kilid sa mga sapa. Ang mga balay nga naa mahimutang sa sapa mahimo nga idemolis nga way order gikan sa korte.
Apan tungod sa nagsingabot nga piliay sa Mayo 2016, dako ang purohan nga di ipadayon ni Mayor Rama ang demolisyon sa mga balay nga nahimutang kilid sa sapa o suba. Onli in da Pilipins! (freezone.ellie588@gmail.com)