MATOD pa sa usa ka Indian poet nga si Rabindranath Tagore nga “ang kamatayon dili maoy pagpakgang sa kinabuhi. Apan mao kini ang pagpawong sa lampara gumikan kay mi-abot na ang kabuntagon.” Pun-an pa gyud nato sa laing panultihon nga ang “kamatayon sama sa usa ka kawatan sa kagabhi-on.” Kinsa ba gyud ang nagdahum nga ang usa ka kugihan ug aktibo nga kapitan sa Barangay San Roque ning dakbayan sa Sugbo bawi-an sa iyang kinabuhi sa sayong pangidaron? Si Kapitan Lidiore “Boy” Miranda nabugtuan sa iyang kinabuhi niadtong Huwebes sa gabii human ata­kiha sa sakit sa kasing-kasing. Nagpangidaron siyag 53 anyos. Nagbangutan karon ang iyang asawa nga si Marites ug ang lima nila ka mga anak.

Pareho kaming lumad nga taga Dipolog City. Apan dinhi na kami nagka-ila sa dakbayan Sugbo ni Kap Boy mga sobra na sa usa ka dekada. Kami ang nagtukod og mga original members sa Cebu-Zamboanga Del Nortehanon Association ( Cezda), kahugpunan sa mga lumad nga taga Zamboanga del Norte nga ania na manarbaho o magpuyo sa dakbayan sa Sugbo. Sama sa akong kaagi, naningkamot usab si Kap Boy nga makahuman sa pagtungha.

Aktibo

Aktibo si Kap Boy sa mga organisasyon nga iyang pagasudlan, ma-civic, community o religious organizations. Dili gyud siya mapakyas sa pagtambong sa mga kalihukan diha sa Sto. Niño ug Cebu Cathedral. Matag prosesyon panahon sa Sinulog ug sa mahal nga adlaw naa gyud permi mokuyog si Kapitan Miranda. Sa dihang misalmot sa pulitika si Boy usa ako sa iyang gikonsulta. Midagan siya pagka konsihal sa San Roque niadtong sayong bahin sa 2000 diin siya midaog. Midaog pagka barangay kapitan niadtong 2013 nga piniliay.

Dihay mga panahon nga misumbong siya kanako sa iyang mga problema sa barangay. Kanang Barangay San Roque maoy usa sa mga problematic nga barangay dinhi sa siyudad gumikan kay ana mahisakop ang pier area nga daghang klaseng mga tawo labi pa ang mga criminal elements. Daghan unta og mga maayong plano si Kapitan Miranda aron malimpyo ug molambo ang iyang barangay. Apan ang kahugaw sa pulitika maoy naghari kay ang iyang mga kaatbang wala gyud mohunong sa pagdaot ug paggukod kaniya. Daghan ang mga isyo nga gibatu ngadto kaniya.

Gani giralihan man siya sa mga lumolupyo nga gipaluyuhan sa mga sakop sa walhong SanlakasmAduna pay signature campaign nga magpa-recall kaniya. Mao siguro kini ang usa sa mga hinungdan nga gikaguol ni Kapitan Boy og maoy hinungdan sa iyang hinanaling kamatayon. Sayang wala niya matuman ang iyang mga damgo sa iyang barangay kay gibawian man siya sa iyang hinuwamang kinabuhi. Adios, higalang Kapitan Boy Miranda. Rest in peace.

(bobby.nalzaro@yahoo.com)