TIUNAY nga pag-ampo inubanan sa subsob nga pagtuon maoy routine sa duha ka manag-agaw’ng Vianca Pearl Amores ug Marianito Jesus del Rio nga pulos milandig sa Top 1 sa Certified Public Accountant (CPA) licensure examination.
Kabanay sa duha ka mga tinun-an nagdahum nang daan nga makatungtong sa Top 10 sila si Amores ug del Rio ilabi na nga migraduwar sila nga Summa Cum Laude (Amores) ug Magna Cum Laude (del Rio) nga accountancy major sa University of San Carlos.
“I feel blessed. Naa sa akong huna-huna nga mag-Top 10 pero ako lang giwagtang kay ma-hurt unya ko kay daghan pa baya og mga bright,” tipik sa pamahayag ni Amores anak ni Lapu-Lapu City Councilor / Atty. Rico Amores.
“Amazing kaayo si Lord kay akong gi-pray nga unta makapasar, but na-shock ko nga Top 1 gyud,” saysay sa 20 anyos nga si del Rio nga second degree cousin ni Amores.
Ang manag-agaw mitug-an nga sa wala pa ang nasudnong pasulit sa CPA ilang gihimo ang siyam ka adlaw nga nobena, rosaryo ug ang pagduaw sa sa simbahan sa Virgen dela Regla, Lapu-Lapu, Basilica Minore del Santo Niño, Cebu City ug Birhen sa Simala, lungsod sa Sibonga.
Unang ambisyon ni Amores, 20, nga mamahimong chef apan gi-agni sa iyang amahan nga mosuway sa pagpa-enroll sa accountancy gumikan sa nakita nga potential tungod kay grabe kining motu-on ug practical sab ang maong kursong ilabi na sa panarbaho.