ANG Holy Cross of Davao College (HCDC) Crusaders nagmangtas, gilangkat ang korona sa 80th Araw ng Dabaw Sports Festival Inter-Collegiate Basketball Tournament title human gipildi ang Agro Industrial Foundation College of the Philippines (AIFCP) 81-76, Lunes, sa duwa nga gihimo sa Almendras Gym Davao City Recreation Center.
Suma ni HCDC coach Isaias Gravador nga luyo sa daghang hagit nga giatubang sa ilang tim, apil na ang lig-ong kontra, positibo silang nakigharong ug gihimo ang tanan alang sa kalampusan.
"When we lost some of our players due to injuries, summer class schedule, graduation and recruitment from Manila, we motivated the team that there is no other way for us to compete but to do things collectively and they have to step up both on offense and defense," ni Gravador sa pakighinabi kaniya.
Gidugang sa best coach awardee nga lisud gyud ang duwa ilabi na nga matag tim di palupig.
"We both wanted to win but we were just lucky enough to secure the title."
Dugang niya: "I’m just happy for the boys, the management headed by our sports director Rudy Salvador and the entire HCDC community."
Pahayag sa coach nga maningkamot sab sila sa pagpangita og dugang pang mga duwa gawas sa siyudad sa Davao.
Ang most valuable player (MVP) James Clarn Linares mihatag sa iyang pinakamaayong performance, uban ang 13 puntos, inabagan sab sa mga serbisyo nila team captain Joshua Aguilon, Jhayston Oquias, Mark Fransisco, ug Harry Dumagan.
"I feel blessed na nakadawat ko sa MVP award kay wala ko nag expect na ako ma MVP."
Ubang magduduwa sa tim mao sila Patrick Quidato, Bernard Gutierrez, Michael Gonzaga, Ken Gudes, Jim Yap, Renzo Galdo, ug Andy Llemit uban sila assistant coach Adel Nobleza ug Caloy Salvador.
Ang Jose Maria College, mipakurat sa St. John Paul College of Davao 72-65, aron makuha ang ika-tulong pwesto sa kalihukan nga gipresenta sa Sports Development Division-City Mayors Office ug gi-opisyalan sa Samahang Basketbol ng Pilipinas.