PIKIT, North Cotabato -- Patay ang usa ka sundalo nga giingong kaslunon na unta atol sa engkuwentro sa Marawi City batok sa Maute Terror Group niadtong miaging adlaw.
Giila ang nakabsan sa kinabuhi nga si Corporal Angelo Estores, sakop sa 5th Mechanized Battalion, Philippine Army ug molupyo sa Pikit.
Matud sa pamilya sa biktima nga nagresponde ang mga kauban ni Estores sa Marawi City apan gibanhigan sila sa Maute group.
Sa wala pa mapatay si Estores, naka-text pa siya sa iyang amahan nga nag-ingon, "Pa i-ampo ko patay na ang siyam ka mga kaubanan ko, patay na sab ang opisyal namo diin nahudtan na sab ko og bala mora'g dili na madayon kasal nako."
Human niadto, wala na maka-text si Estores sa iyang pamilya ug nakadawat na lamang sila og impormasyon nga napatay kini sa engkuwentro batok sa mga terorista.
Ang sundalo kaslon na unta niadtong Mayo 29 sa iyang hinigugma apan subo gumikan dili na kini mahinayon.
Nagpaabot si Pikit Mayor Sumulong Sultan og hinabang ngadto sa pamilya sa biktima.
Samtang nagpadayon pa ang katag-katag nga engkuwentro sa militar batok sa Maute group sa Marawi City. (Edgar E. Fuerzas)