USA ka sakop sa Citizen Armed Forces Geographical Unit (Cafgu) ang namatay human gipusil sa kanhi miyembro sa Cafgu alas 9:00 sa buntag niadtong Dominggo didto sa Barangay Crossing Bayabas, Toril District, Dakbayan sa Davao.

Ang biktima mao si Edwin Anto Ambalayon, sakop sa Cafgu ubos sa 72nd Infantry Battalion sa P7, Barangay Sibulan, Toril District, samtang ang suspek mao si Dennis Adon, alyas Toto, ulitawo, habal-habal driver, ex-Cafgu kinsa kauban sa biktima.

Sa inisyal nga imbestigasyon ni Police Officer 3 Danilo Alngog nasayran nga ang biktima ug suspek anaa sa balay sa paryente sa biktima.

Gi-ingon nga mihangyo ang suspek nga magpapalit og beer ug gilayong gipalitan sa biktima.

Dihang nagbaktas na ang biktima padung sa tindahan, kalit kining gipusil sa suspek sa makadaghang higayon nga miresulta sa iyang hinanaling kamatayon.

Human sa hitabo, daling misibat ang suspek sakay sa motorsiklo nga gisundan sab sa usa ka lalaki kinsa sakay sab sa motorsiklo nga kolor pula padung sa Lubogan, Toril.

Nakuha sa nahitaboan ang pito ka basiyo ug duha ka balinis sa bala sa .45 nga pistola nga gituohang gigamit sa pagpusil sa biktima.

Ang kapulisan nagsubay pa sa hinungdan sa pagpamusil samtang ang patay nga lawas sa biktima anaa gihaya sa Angel Funeral Parlor sa Toril.(JEEPY P. COMPIO)