DAVAO CITY -- Patay na nga nahidangat sa tambalanan ang usa ka lalaki kinsa giingong gi-atake sa kasingkasing samtang nakig-sex sa usa ka babaye alas 7:45 sa buntag, niadtong Dominggo sa usa ka iladong hotel sa Barangay Matina Aplaya, Talomo District.

Ang biktima mao si alyas Mario, lumad nga taga Barangay Nalin, Midsayap, North Cotabato kinsa gi-ingong midayo sa Davao City aron maglulinghayaw.

Subay sa spot report sa Talomo Police Station pinaagi sa imbestigador nga si Senior Police Officer 1 Bryan Tejano nasayran nga samtang anaa sud sa kuwarto silang duha, kalit lamang nahagba ang biktima.

Daling nanawag ang babaye og room attendant dayon gidali pagdala pinaagi sa supervisor sa hotel nga si Frederic Orendain ang biktima sa Southern Philippines Medical Center (SPMC) apan gideklara siya nga dead-on-arrival ni Jhunny S. Salinas.

Dugang impormasyon nga nakalap sa Sun.Star Superbalita gi-ingon nga samtang anaa na sa taas nga kalipay ang duha, kalit mihuot ang dughan sa biktima ug kalit kining nahagba sa salog.

Dihang nahadlok sa panghitabo ang babaye, dali kining mitawag og room attendant ug gilayong gipahibalo sa supervisor.

Mga alas 8:00 sa buntag nahidangat ang biktima sa SPMC apan bugnaw ug wa na kini kinabuhi.

Sukad sa pagsuwat ning balita ang patay nga lawas sa biktima anaa sa morgue sa SPMC.