KINSAY magtuo nga ang pagbiya ug kaon ni Lolo Antonio “Tonio” Suson ug karneng baboy, pag-inom ug kape maoy pipila sa mga rason nga miabot ang iyang pangedaron ug 100?
Sa edad nga 100, nagpabiling himsog si Lolo Tonio, gani, misugyot kaniya ang iyang doktor sa pagkaon ug taman karon tungod kay way man siyay high blood ug diabetes.
Ang katapusang pagbisita ug pagpa-check up ni Lolo Tonio niadto pang Nobyembre tungod sa iyang gihambing ubo.
“Kay wala man siya’y high blood ug diabetes, giingnan siya sa doktor na kaon na lang kung unsay gusto nimong kan-on,” matod ni Benigno, 63, kamanghurang anak ni Lolo Tonio.
Si Lolo Tonio nga naggikan sa Brgy. Paknaan, dakbayan sa Mandaue nagsaulog sa iyang ika-100 nga kasumaran niadtong Hunyo 13 didto mismo sa iyang panimalay.
Maayo pa mulakaw ug mo-istorya si Lolo Tonio kinsa adunay tulo ka anak nga lalaki, 15 ka mga apo ug 20 ka mga apo sa tuhod apan hinay na ang iyang pandungog.
Atol sa iyang kasaulogan sa adlawng natawhan ni Lolo Tonyo, tanan niyang mga anak, apo ug apo sa tuhod ang misaksi. Silang tanan nagsul-ob ug violet nga mga t-shirts nga may tatak nga “World’s Most Awesome Lolo Turns 100.”
Simple nga Kasaulogan
Gitataw sa kamanghurang anak ni Lolo Tonio nga si Benigno, 63, nga wa nangandoy ang iyang amahan ug bongga nga party.
Paambit niya nga ang iyang Papa mismo nagkanayon nga kontento na kini bisan ug manok lang ang ilang hikayon.
“Dili mahimo mag-ihaw lang og manok. Panagsa ra baya nang muabot og 100 years ang tawo,” matod ni Benigno sa dihang gikahinabi sa Sun.Star SuperBalita.
Human gipahimanguan ang iyang amahan sa pagkaon og taman sa doktor, kanunay na kini nga mangita ug humba human nakatilaw kausa.
rMga kasinatian
Si Lolo Tonio nagdako nga mag- uuma sa may Brgy. Paknaan, kinsang yuta gitukuran na karon og dakong factory sa maong lugar.
Grade 1 lang ang nahuman ni Lolo Tonio. Sa dihang gikahinabi ning mantalaan, gisaysay ni Lolo Tonio nga misibat siya kauban ang iyang pamilya ngadto sa isla sa Bohol panahon sa gubat ug pagsakop sa mga Hapon sa nasud niadtong 1940s.
Didto sila mitago sa Bohol sud sa lima ka mga buwan.
Miundang sa pagpanguma si Lolo Tonio sa dihang nagpangedaron siya og mga 70 ug nitabang nalang sa pagpadagan sa tindahan sa iyang anak.
Tanang mga igsuon ni Lolo Tonio mipanaw na sa laing kalibutan. Ang iya usab asawa namatay na mga 20 na ka tuig ang nakalabay.
Ang kamagwangang apo ni Lolo Tonio nagpangedaron og 52 anyos.
Maayo nga amahan, lolo
Paambit ni Benigno nga maayong modala isip amahan si Lolo Tonio sa ilang tulo ka managsuon. Gani, si Lolo Tonio pa ang migasto sa mga kasal sa iyang mga anak nga silang Benigno, Rodolfo, 71 ug Eriberto, 73.
Gawas niini, si Lolo Tonio usab ang miabag sa pagpatukod og balay sa duha niya ka mga anak nga silang Rodolfo ug Eriberto.
“Wa gyud mi ikasaway sa among amahan maong karon amo siyang gipangga,” ni Benigno.
“Istrikto siya apan naa sa lugar, mamunal pa gani siyag bayabas sauna. Pero maayo kaayo modala. Kung unsay ihangyo nimo, ihatag niya basta makaya lang,” dugang niya.
“Moingon ko nga indescribable siya as a person, as a father and as a grandfather,” ni Atty. Mary Ann Suson, usa mga apo ni Lolo Tonio.
Si Mary Ann nagkanayon nga kugihan gihapon nga motabang pagbantay sa ilang tindahan ang iyang lolo bisan niadtong nagpangidaron pa kini ug 99.
“Maghimo pa na siya og ice unya mamutos pa na siyag asukar nga gi-repack og tag ¼ and everything,” ni Mary Ann.
Usa mga mga nakat-unan ni Mary Ann sa iyang lolo mao ang mga values nga gitudlo niini ngadto kanila, usa na niini ang pagkugi sa kung unsay imong buhatan.
“You would really see nga wa siyay regret sa iyang life gyud. Kon makakita ka niya, mo-smile ra na siya and the recollection is very vivid, very sharp. Siya ang type sa Lolo nga mangita nimo unya mo-encourage nimo,” malipayong padayag ni Mary Ann sa Sun.Star SuperBalita.