KANHI sakop sa Philippine Air Force (PAF) Joel Seldura ang nasikop na sab human positibo nga gitudlo nga maoy mipusil-patay sa anak sa sakop sa Bureau of Fire and Protection (BFP) sa dakbayan sa Lapu-Lapu.
Gitug-an ni P/SInsp. Wilbert Parilla nga nadakpan si dismissed Staff Sgt. Joel Seldura niadtong Hunyo 11 sa alas 2:30 sa hapon sa Sacred Heart Village, barangay Gun-ob sa naasoyng dakbayan sa dihang nakadawat sila og armed person alarm.
Sa ilang pagdala sa Police Station 3 nisibo ang description ni Seldura sa suspek nga mipusil-patay niadtong Robert Martini Amores, 33, anak sa mitaliwan nga si SFO1 Paul Amores sakop sa Lapu-Lapu City Fire Department.
Si Seldura, 45, nga taga-Mactan Benito Ebuen Air Base (MBEAB) ang positibo nga giila sa asawa sa biktima ingon man niadtong minor de edad nga saksi nga maoy mipusil ngadto ni Amores nianang pagka-kadlawon sa maong adlaw.
Ang naasoyng suspek nga gihinganlang og “Army nga karaan” nakuhaan og 38 kalibre nga rebolber og gikataho nga ang armas nga nakuha mao ra usab ang iyang gitira ngadto sa iyang biktima samtang nagbarog kini daplin sa kalsada sa Sacred Heart Village.
Patay diha-diha si Amores sa dihang nakaangkon og samad pinusilan diha sa iyang ulo.
Base sa inisyal nga imbestigasyon sa kapulisan nga adunay kalambigitan sa ginadiling drugas ang kasong pagpatay ni Amores.
Atol niining pagsuwat, gisang-at na sa Piskaliya ang kasong murder batok ni Seldura lakip na ang illegal possession of firearms ug possession of illegal drugs kinsa una nang nadakpan niadtong Oktubre sa miaging tuig human nanulis sa LPG shop sa barangay Marigondon.