DILI mominos 30 ka mga sakop sa United Small Vendors in Cebu City (USVVC) nga giabagan sa Kilusan para sa Pambansang Demokrasya (KPD) ang nag-rally atubangan sa Cebu City Hall kagahapon.

Nanawagan ang gru­po nga ihunong ang giingong dili makiangayong pagpapawa kanila sa sidewalk, dapit nga agianan sa mga tawo.

Gilangkoban ang maong grupo sa sidewalk vendros sa Leon Kilat duol sa Elizabeth Mall, South Bus Terminal ug N. Bacalso.

Nanawagan usab sila sa pagpalagpot ni Raquel Bohol-Arce, pangulo sa Prevention Restoration Order Beautification Enhancement (Probe) ug niawhag ni Mayor Michael Rama nga hatagan sila og hustisya.

Gitawag nila si Arce og “berdugo” gumikan sa pagpatuman sa mando ni Rama paghawan sa mga vendor nga illegal nga namaligya sa sidewalk nga wala gitugot alang sa Garbo Asenso Sumbanan Alyansa (Gasa).

Si Emmalyn Aliviano, tigpamaba sa KPD, niingon nga wala tagda sa Gasa nga nag-regulate sa paninda sa sidewalk ang hangyo sa mga vendor ug nitabang sila sa maong grupo sanglit naluoy sila nga nagtan-aw sa padayon nga pangabuso sa siyudad ngadto sa mga gagmay nga manindahay.

Dugang niya nga nagtuo siya nga ang Gasa maoy hulip sa Cebu City United Vendors Association (CCVUVA) sanglit sila usab ang nidapig sa mga napahawa nga mga vendor sa Warwick Barracks sa nakalabay nga tuig.

Samtang, giklaro ni Arce nga igo lang siya nagtuman sa mando sa mayor ug iyang gipasabot nga ang Osmeña boulevard, Colon ug Carbon area maoy gitugot sa Gasa.

Dason ni Arce, ang ambulant vendors nga naa gawas sa nahisgo­tang dapit pulos ilegal.

Giawhag usab niya ang mga tawo nga nipasangil kaniya og dili mao sa pagsang-at og sumbong kay iyang atubangon sama pananglit sa giingong pagpaligis sa ilang mga paninda, pagdapat sa mga vendor ug pagpanghulga.

Si Arce nidugang nga bisan sa maong rally, dili siya mohunong sa pagtuman sa mandato sa iyang buhatan.