WA pay enrollment ug di pa makasugod og klase ang Cebu Technological University (CTU) extension classes sa Barangay Bonbon, bukirang barangay sa habagatang distrito sa dakbayan sa Sugbo.

Kini sukwahi sa ni­ga­was nga balita nga ka­rong Hunyo 22 magsugod na pag-eskwela ang mga tinun-an.

Si Jay Litrondo, chief administrative officer sa CTU Main Campus, nagkanayon nga wa pa sila mahuman og check sa admission test sa mga tinun-an aron pagtino kon angay ba silang ipailawom sa interview sa di pa ang enrollment.

Matod nga niya hukman pa sa Board of Regents sa CTU kon angay ba silang mohimo og klase sa giplanohan ni Kongresista Rodrigo Abellanosa nga extension campus karong unang semana sa Hulyo.

“Wala pa gyuy nahitabong enrollment sa bukid (Bonbon). Mao nay klaro. Sure gyud ko ana kay nag-conduct pa ta og examination,” matod ni Litrondo.

Si Abellanosa niuyon sa pamahayag ni Litrondo uban sa pagbutyag nga giatiman na sa tunghaan ang ubang gikinahanglan aron makasugod na pagtungha ang mga tinun-an.

“The processes for enrollment have been undertaken by the CTU the past weeks including the admission tests,” nagkanayon si Abellanosa.

Matod niya nga karong semanaha ipahigayon ang mga interbyu ug base unya sa resulta, mosunod ang enrollment.

Si Litrondo nibutyag nga kon dili makapahigayon og klase ang CTU sa Bonbon hilabi na kon dili makaabot og sobra 80 ka mga tinun-an kay 90 ra kapin ang nikuha og eksaminasyon, hayan ang ma-enroll ilang patunghaon sa CTU main campus.

Si Raddy Diola, chairman sa city scholarship committee, niingon nga di angay problemahon sa tinun-an ang transportasyon kansang pinuy-anan 20 kilometros gikan sa siyudad sanglit mamahimo silang mohatag og libreng sakyanan.

Si City Legal Officer Jerone Castillo niingon nga angay tumanon sa CTU ang pagkuha og building permit kon motukod sila og building sa lugar.

Si Abellanosa nakakuha og P6 milyones alang sa sweldo sa mga magtutudlo gikan sa Department of Budget and Management (DBM).

Laing P25.5 milyones sa pagtukod og building iyang nakuha gikan sa Department of Public Works and Highways (DPWH).

Apan si Mayor Michael Rama nibutyag nga sa di pa makatukod kinahanglan silang mokuha og mga permit.

Niadtong Sabado, nitumaw ang gamay nga tensyon human niabot ang clearing team sa City Hall pinangulohan ni Raquel Arce ug mga pulis.

Naatol usab nga didto sila si kanhi Mayor Tomas Osmeña, iyang asawa nga si Konsehal Margot, Abellanosa ug ilang mga kaalyado nga konsehal.

Sila si Arce niadto gumikan sa report ni Kapitan Alexander Ibarita nga adunay illegal construction sa sports complex, apan sa ilang pagsusi mga partition isip preparasyon sa klase.