SALA sa balay sa usa ka German national ug sa iyang asawa nga Pinay nabungkag kay gilabay og granada sa wa mailhing tawo niadtong Domingo sa alas 7:44 sa gabii sa Sitio Landing, Barangay Catarman, Liloan, Sugbo.
Nangayo og tabang sa kapulisan ang managti-ayong Wolgang, 47, ug iyang asawa nga Pinay nga si Milagros Grief, 46, human mabungkag ang bongbong sa sala, kisame ug mga bildong bahin sa ilang balay.
Pulis nga sakop sa Cebu City Police Office (CCPO) ang ilang gidudahan.
Naluwas ang pamilyang Grief sa dautang panahon.
Si Sr. Insp. Ramil Morpos, hepe sa Lilo-an Police Station nga nahinabi sa Sun.Star Superbalita, nagkanayon nga ang managtiayong Grief, uban sa ilang anak diha sa veranda sa ilang balay sa wa pa ang pagpanglabay.
Nanulod sila sa lawak human naglain ang panahon.
“Hangin man daw kaayo sa gawas. Maorag habo-baho ba mao nga nakadesisyon sila nga manulod na lang dihang kalit nga miulbo sa gawas,” dugang ni Morpos.
Matod ni Morpos nga kagahapon sa alas 6:00 sa buntag ilang nakompirmar nga granada maoy gilabay dihang nakit-an ang safety lever sa Crime Scene Investigator (CSI) sa Cebu Provincial Police Office (CPPO).
Gituohan nila nga ang naglabay sa granada didto nanukad sa habig sa dagat ug nitugpa sa may bongbong sa balay hinungdan nga nangabuak ug nabungkag ang kisame.
Gihulagway niya nga ang sala sa balay maoy nabungkag og maayo.
Dako ang kadaut sa balay apan di pa sila makasulti pila kini.
Usa ka pulis sa CCPO ilang ipatawag sanglit usa kini sa gihisgutan sa German ug asawang Pinay nga ilang gikaaway.
Ang maong pulis ilang gipasakaan og kaso sa National Police Commission (Napolcom) pipila ka buwan ang milabay.
Ila kining gipasanginlan nga nangulata sa German ingon man nani-on og armas.
Matod ni Morpos nga ipatawag sab nila ang ubang mga silingan sa mga biktima nga ilang gikaaway aron makuhaan sa ilang habig.