GIBUTYAG ni Cebu running queen Mary Joy Tabal nga daghan pa siyang gustong maabot human siya nakasakmit og silver medal sa 2015 Southeast Asian Games Women’s Marathon event sa Singapore.

Gipasabot ni Tabal, 25, nga human sa iyang gipakita sa labing una pa lang niyang pagsalmot sa SEA Games, adunay plano ang Philippine Amateur Track and Field Association (PATAFA) alang kaniya.

“My plan after SEA Games is to continue my training coz I think PATAFA has a plan for me but can’t tell pa right now coz amo pa daw i-finalize. After SEA Games, mag-meeting pa me,” chat ni Tabal sa Facebook alang ning mantalaan.

Nagkana­yon si Tabal nga ma­lipayon siya kauban ang iyang coach nga si John Philip Duenas sa kalampusan nga ilang naangkon sa SEA Games.

Gitataw sa produkto sa Southwestern University (SWU) athletics nga ang iyang kalampusan sa SEA Games nakadugang kaniya og kadasig nga mas mokayod pa sa training.

Ubay-ubay na sab nga international marathon ang naapilan ni Tabal apan iyang giklaro nga la­hi gyud ang pamati kon magrepresentar ka sa nasod.

”Lipay kaau ko, li­pay kaayo mi ni Coach Philip. Wala’y kabutangan ang among kalipay, sa blessings nga niabot sa amoa karon. Sa tanan sakripisyo namo sa training, sa among naagian nga mga pagsuway, naabot ni namo karon,” dugang chat ni Tabal.

Gipasabot ni Tabal nga pangandoy gyud unta ni Duenas nga makasalmot sa SEA Games apan wala kini natuman gumikan kay daghan na man kini’g gipangtudloan nga runners.

Mapasalamaton si Tabal sa suporta ni Duenas, alang kaniya dili niya maabot ang kalampusan kon wala ang iyang dugay nang coach.

“This silver medal is from the effort, patience and hardwork of Coach Philip. He is not a national coach right now but sa iya gipakita on how serious he was sa pag-prepare nako for SEA Games, makaingon ka nga naa gyud iyang heart ani nga event,” laing chat ni Tabal.

Giklaro ni Tabal nga kon siya lang ang matuman, gusto niyang marepresentar sa nasod sa mas lisod ug mas dakong tahas – ang Asian Games.