KASAMTANGANG nakignegusasyon si Cebu Schools Athletic Foundation Inc (CESAFI) commmissioner Felix Tiukinhoy kang VIVA big boss Vic Del Rosario alang sa television coverage sa basketball even.
Giklaro ni Tiukinhoy nga wala pa’y pinal silang gikasabutan apan masaligon siya nga magmabulokon ang tanan.
“We’re still in the process of negotiating, nothing is final yet,” matod ni Tiukinhoy.
Ang 2015 Cesafi season gikatakdang sugdan karong Agusto 1 sa Cebu Coliseum.
Sa laing bahin, gipahibalo ni Tiukinhoy nga aduna sila’y bag-ong mga lagda nga ipatuman karong tuiga.
Usa na niini ang pagbutang og standby ambulance sa tanang mga duwa hangtod mahuman ang torneyo.
Gihimo kini sa Cesafi aron malikayan ang nahitabo sa Manila diin usa ka high school player sa Jose Rizal Memorial University Light Bombers nga si Carl Jimwell Servillon,17, ang nipanaw human nakuyapan atol sa usa ka duwa sa pre-season tournament FilOil Flying V Premier Cup sa San Juan City Arena sa miaging buwan.
Nidugang si Tiukinhoy nga papormahon sab og cheering squad ang tanang teams nga langkuban og 30 ka mga tawo.
Ang mga sakop sa cheering squad libreng makasulod sa venue kon aduna ra’y duwa ang team niini.