NAPANITAN sa Meralco Bolts ang Barangay Ginebra San Miguel, 102-99, atol sa 2015 PBA Governor's Cup niadtong Domingo sa SMART-Araneta Coliseum.
Ang lay-up ni Bolts import Andre Emmet sa 32 segundos nabilin sa dula mao'y nahimong turning point diin nibira kini og krusyal nga labaw gikan sa kulbahinam nga panagtabla sa 99-tanan.
Nisulay ang Ginebra nga tablahon ang dula apan napakyas sila aron mahatag ang kadaogan sa Bolts.
Nihuman si Emmet og 34 puntos, upat ka rebounds ug upat ka assist, samtang sila Seiya Ando, Jared Dillinger ug Reynel Hugnatan nidugang og 12 puntos matag usa alang sa Bolts.
Sa kadaogan, nibugkos ang Bolts sa ikalima nga pwesto uban sa Rain or Shine Elasto Painters nga adunay lima ka daog ug upat ka pilde matag usa.
Ang Ginebra nahulog sa alanganin nga makasulod sa top-8 crossover diin aduna lang kini tulo ka daog ug unom ka pilde nga anaa sa ikanapulo nga pwesto.
Sa unang dula, mikulit si Jarrid Famous og usa ka performance nga lisod kalimtan sa dihang iyang giaswat ang GlobalPort Batang Pier ngadto sa 102-94 nga kadaugan batok sa Kia Carnival.
Ang 6-foot-11 nga import mirehistro og 30 puntos ug 37 ka rebounds, gawas sa tulo ka blocks sulod sa 45 minutos alang sa ilang ikaduhang sunod-sunod nga kadaugan nga mao'y nag-instalar kanila sa ika-unom nga puwesto sa 10 ka duwa.
Ang natala ni Famous nga 37 ka rebounds mao'y pinakadaghan sulod sa usa ka duwa sukad niadtong 1985 diin ang import sa Ginebra nga si Michael Hacket nakahimo og 55 ka rebounds niadtong 1985.
Gani hapit niya malupig ang kinatibuk-ang Kia squad kinsa nakalangkat og 40 ka rebounds nga layo ra sa 68 nga nahimo sa Batang Pier sa maong duwa.
Nakahatag og igong suporta ni Famous mao ang locals nga sila si Terrence Romeo ug Stanley Pringle.(uban sa taho sa SUNNEX/Jun Migallen)