GITAKDANG moanhi sa lalawigan sa Sugbo si Presidente Rodrigo Duterte karong adlawa ug makighinabi sa kasundalohan dinhi sa Visayas.
Sa akong pangagpas, di modeklarar og martial law karon ang presidente. Mabinantayon man ang Sugbo ug nagtuo ko igo lang mo-inspeksyon ang presidente sa kaandam nato batok sa mga teroristang Isis.
Bisan pa man og daghan dinhi sa Sugbo ang wala makauyon sa martial law, ang atong mga opisyal wa mosupak sa pagdeklarar niini diha sa Mindanao.
Hinuon, managlahi ang mga opinyon kon pagpahamtang na og martial law sa Visayas ang hisgutanan.
Bisan pa man, atong masabot nga konsultasyon sa mga lokal nga lider ang mahinungdanon.
Sigi na sab sa pagpangandam ang Sugbo labi na nga nilabay na ang unang deadline nga gitakda sa AFP mga mapuo na ang mga terorista nga nagtago karon sa Syudad sa Marawi.
Apan nagtuo sab kita nga kon molampos ang AFP sa pagpildi sa mga terorista didto sa Marawi, di na gyud kinahanglang mag-martial law pa sa Visayas lakip na ang Luzon.
Angay pahingusgan pa sa AFP ang ilang opensiba Marawi City karong nilabay ang ilang deadline.
Di terorista?
Miinsister si PNP Chief Ronald ‘Bato’ dela Rosa nga dili terorista ang niataki sa Resorts World Manila kay usa lang kadto ka pildero nga nanghasi. Human sa kagubot, nasayran nga 38 tanan ang nanganatay.
Nagdala kini og M14 rifle ug bag nga may sudlanan nga napuno sa gasolina dihang nisulod sa Resorts World Manila. Nagpabuto kini ug gisunog ang pipila ka lamesa sulod sa casino.
Nahuman ang maong kagubot dihang na-corner sa usa ka kwarto sa fifth floor ug nisunod sa iyang kaugalingon ang maong tawo nga giingong usa ka langyaw. Matod pa naigo dihang nakigpinusilay sa mga gwardiya sa wala pa kini motago sa maong lawak.
Manghinaot lang ko nga mailhan na kining maong gun man aron lang gyud atong matino kon si kinsa siya ug maseguro kita nga di gyud usa ka terorista.
Di man siya terorista gani, apan ang epekto sa iyang gibuhat daw sama ra sa buhat sa usa ka terorista.
Lalim bay 38 ang mga nangamatay? Dayon, nag-anunsyo na og warning ang pipila ka embahada sa ubang nasud alang sa ilang mga citizens nga magmatngon sa ilang pagsuroysuroy sa Pilipinas.
Unya si Presidente Donald Trump sa Estados Unidos nitawag na og terorista sa tawo nga niataki sa Resorts World Manila. Bisan ila nang gibalik-balik og sulti nga pildero lang kadtong niataki, lahi ang pagtan-aw sa uban.
Tungod niining maong hitabo, di mahimong maglugak ang Sugbo. Kay di lang terorista ang atong bantayan, lakip nang mga amaw nga magpatakag panghasi kon mapildi sa casino. (@anol_cebu sa Twitter)