NAKAKUHA ang Golden State Warriors og bwelo sa kataposan nga kwarter aron molahutay sila sa kadaogan batok Cleveland Cavaliers, 104-91, sa Game 5 sa ilang best-of-seven NBA Finals Series kagahapon.

Nibira si Stephen Curry og 21 puntos gikan sa tres sa iyang 37 puntos sa dula aron mangulo sa Warriors, samtang si Draymond Green midugang og 16 puntos apil iyang siyam ka rebounds ug unom ka assist.

Gikan sa 85-84 nga labaw sa 5:10 minutos nabilin sa kataposan nga kwarter, nangulo si Andrei Iguodala og usa ka run sa iyang upat ka puntos sundan dayon sa lay-up ug eksklamasyon nga tres ni Curry aron mainat ang labaw sa Warriors sa napulo, 96-86, sa 2:44 minutos nabilin.

Sila Green ug Iguodala nihatag og lig-on nga depensa kang Lebron James sa Cavaliers.

"Daymond Green got a good job defending LeBron there," ingon sa kanhi-Detroit Piston nga saligando nga si Grant Hill sa iyang pagkomentarista sa post-game analysis sa NBA Premium.

Matod sab ni Warriors coach Steve Kerr nga aminado siya nga maayo ang pagdepensa ni Iguodala, nga nihuman og 14 puntos, walo ka rebounds ug pito ka assist, kang Lebron.

Nisulay og bangon ang Cavaliers gikan sa 10 puntos nga biya paagi pag-foul nila kanunay kang Iguodala, nga mubo kaayo og prosyento sa freethrow nga aduna lang duha sa 11 ka attempt.

Apan namugnaw ang Cavs pagsulay nila og dikit sa dula. "We did not let the momentum slipped," ingon ni Curry sa ilang kadaogan.

Nihuman si LeBron og 40 puntos, 14 rebounds ug 11 assist, samtang nipatak si Tristan Thompson og 19 puntos ug 10 ka rebounds. Nalimitahan na sab si Matthew Dellavedova sa lima ka puntos.

Niadtong Game 3 nikulit siya og 20 puntos apang 10 puntos lang siya sa Game 4.

Si JR Smith nangulo sa bench nga aduna'y 14 puntos samtang si Mike Miller, nga kauban ni LeBron sa pagkampyeon sa Miami Heat sa Finals sa 2013, nidugang og tres puntos gikan sa tres sulod sa 13 minutos niya sa dula.

Labaw na ang Warriors, 3-2, sa ilang siris.