PATAY ang usa ka vendor human gipusil sulod sa pampublikong merkado sa Carmen, Dakbayan sa Cagayan de Oro niadtong Domingo sa tungang gabii.

Nilahos ang bala sa likod nga bahin sa lawas ni Ronel Dagooc, 25, ulitawo, taga Tagpange ning dakbayan.

Sa inisyal nga imbestigasyon sa kapolisan nasayran nga nagplastar ang biktima sa mga sinako nga saging sa usa ka dapit sa merkado dihang giduolan sa wala maila nga suspetsado ug deretso nga gipusil.

Giingong nakadagan pa ang biktima bisan kong samdan na ug dali kining gidala sa kapolisan sa Northern Mindanao Medical Center (NMMC) apan mga ala 1:55 kagahapon sa kaadlawon gideklara kining patay.

Nakaangkon og samad pinusilan sa wala nga bahin sa dughan ug nilahos sa likod ang biktima hinungdan sa hinanali niini nga kamatayon.

Ang kapolisan sa Police Station 4 (PS4) sa Carmen mibutyag nga nagpahigayon sila og manhunt operation human aduna'y gibutyag nga responsable ang biktima sa wala pa kini makabsi sa kinabuhi apan gitago pa una kini aron mamahimong malampuson ang ilang operation.

Usa matod pa ka laborer sa susama nga merkado ang gitumbok nga suspetsado sa maong krimen apan ang motibo niini ang padayon pa nga gisuta sa tinugyanan sa kapolisan.