GIBUTYAG ni Konsehal Dante Pajo kinsa chairman komite sa Health and Sanitation sa konseho nga iya na nga gipatawag ang mga personahe alang sa usa ka meeting ug hisgotan ang sakit nga Mers-Cov kon Middle East Respiratory Syndrome Coronavirus (MERS-CoV).

Matod ni Pajo nga ila kining daan nga gipangandaman tungod kay daw simbako aduna'y makasulod sa dakbayan nga nagdala sa sakit nga susama niini.

Apil sa gipatawag ang mga kadagkoan sa Department of Health-Northern Mindanao, City Health Office, mga personahe sa Jr Borja Hospital ug Northern Mindanao Medical Center.

Gibutyag ni Pajo nga atol sa ilang committee meeting napin-point na kung unsa nga hospital o balay tambalanan kung daw simbako adunay makasulod nga kaso denhi sa siyudad sa Cagayan de Oro ug natumbok nga mao ang NMMC.

Gipasabot ni Pajo nga walay angayan ikabalaka tungod kay walay kaso niini dinhi sa dakbayan apan ila lamang kining gipangandaman labina aduna usa ka pinoy nga nataptan niini sa Riyadh, Saudi Arabia, nga gikumpirma sa Philippine Embassy sa Riyadh.(SVB)